POSIBLENG di na tugotang makabiyahe ang mga tricycle drayber sa dakbayan sa Lapu-Lapu nga di mopaubos sa nagpadayong libreng swab test sa Kagamhanan.
Kini ang gibutyag ni Lapu-Lapu City Mayor Junard Chan human nga minos ang nipaubos sa swab test alang sa mga drayber sukad sa miaging semana.
Matod ni Chan nga iyang pahinumdoman ang mga asosasyon sa tricycle drayber sa dakbayan kalabot niini gumikan kay alang kini sa kaluwasan sa mga sumasakay.
Gipadayag sa mayor nga ang pagbiyahe karon sa mga tricycle gipaagi og special permit ubos sa modified general community quarantine (MGCQ) hinungdan nga mahimo nga di nila isyuhan ang driver og permit kon di mopaubos sa swab test. Kon mopugos gayud kini og dagan bisag di mopaubos sa swab test, posibleng maisyuhan kini og citation sa City Traffic Management System (CTMS). (GCM)