ANG kurapsiyon maoy usa ka sakit nga lisod kaayong sumpuon ug tambalan. Tipik ug kabahin na kini sa atong sistema ug sa atong kultura. Bisan asa dili lang sa gobiyerno, anaa kining maong sistema bisan pa gani sa simbahan, nga atong gituohan nga tarong ang mga tawo nga anaa diha.
Pero mas grabe gyud sa gobiyerno kay kuwarta man sa mga magbubuhis ang gikawkaw ug gipahimuslan niining mga kurakot sa kagamhanan ug gikan sa pribadong sektor. Ang publiko nga makigtransaksiyon sa gobiyerno mosuburno ngadto sa anaa sa posisyon sa kagamhanan aron makapangayo og pabor. Kurapsiyon na kana.
Dili pa lang dugay, si Presidente Rodrigo Duterte mntanyag nga modemitir sa iyang katungdanan gumikan sa, matod pa, dili na mabangbang nga kurapsiyon. Matod sa Presidente nga lisod nga sumpoon kining maong matang sa problema. Ang anti-drug campaign ug kurapsiyon maoy sentro unta sa kusganong kampaniya ning maong administrasyon. Ning iyang planong pagdimitir, pag-angkon ba kini nga pakyas siya sa iyang gipanumpaan nga sumpuon ang kurapsiyon?
Matag ilis sa administrasyon sa nasud, kanunay nga mahimong dakong isyo ang panikas o pagpangurakot. Gani, halos na lang kitang tanan makatuo nga kining kurapsiyon usa na ka normal nga pamaagi sa gobiyerno nga hangtod ang Presidente mi-isa na sa iyang mga kamot. Buot nang mo-resign kay di na niya makaya ang problema sa kurapsiyon sa iyang administrasyon.
Apan tingali, una siya manulisok sa iyang mga sakop nga nanikas, maayo tingali nga iyang apilon pag-ihap ang iyang kaugalingon kay siya man ang amahan ning nagpabadlong nga mga kawatan sa gobiyerno. Unsa ba ka ugdang dawaton ang mga bahad sa silot alang sa mga tikasan ug sa mga nanamastamas sa public funds? Kon ang masilutan mao lang kadtong dili niya kaalyado, apan ang iyang mga hinanib nga nakahimo og kurapsiyon, nagpabiling gawasnon.
(bobbygnalzaro@gmail.com)