APROBADO ni Mayor Edgardo Labella ang pagbadlong ug pagdili sa Cebu City Police Office (CCPO) sa videoke sa adlawan niining pagsugod sa klase sa pampublikong mga tunghaan.
Ang mayor nagkanayon nga moisyu siya og executive order para maoy magsilbing sumbanan sa pulis pagpatuman para di madisturbo ang mga estudyante nga nag-eskwela pinaagi sa modular, online ug offline classes.
“We will consider that especially the classes are now held literally at home, we will abide with that to see to it that our students will not be disturbed,” padayag ni Labella.
Plano ni Labella nga ang pagdili magsugod sa alas 8 sa buntag hangtod alas 5 sa hapon, gikan sa Lunes hangtod sa Biyernes
Nakita ni Labella ang kamahinungdanon sa pagpatuman niini bisan iyang gipanglantawan nga maihap ra ang mga tawo nga mag-videoke panahon sa kabuntagon o kahapunon sanglit sagad anaa sa kagabhion.
“These are extraordinary times (pamdemic) and we can issue the neccesary EO especially if the purpose is to implement existing ordinances. I think there is no legal impediment,” dugang sa mayor.
Gihulagway ni Labella nga dili tiaw ang problema nga giatubang karon.
Nagsilbing hagit ang sitwasyon unsaon pagkat-on sa mga estudyante hilabi na ang naa sa pre-school ug elementary nga nagkinahanglan og igo nga partisipasyon sa ginikanan.
Giklaro niya nga kon ang pagdili sa videoke sa mga balay sulod sa siyam ka oras nga maoy ting-eskwela makatabang para mahatagan og alibyo and problema, dili magduhaduha pagpatuman ang iyang administrasyon.
“Imagine the difficulties now, facing our students. Let us find a way that at least mitigates and diminishes the problems that we are now facing. I think there is an ordinance and will issue an executive order and spell out the particular ordinances that regulate this kind of activity,” dugang sa mayor.
Ang Cebu City Ordinance 309 niamendar sa anti-noise pollution regulation, o Ordinance 1940, nga naghimong “unlawful for any person to willfully cause loud and disturbing noise through, among other means, the uncontrolled operation of video karaoke sound systems and other similar sound-producing devices between the hours of 7 p.m. and 5 a.m. of the following day.”
Makalapas niini pahamtangan og multang P5,000 o usa ka tuig nga pagkabilanggo.
ROVING
Ang CCPO nipahibawo nga ilang idili ang videoke panahon sa adlawan tungod sa pagsugod na sa klase. Kapulisan sa Siyudad sa Sugbo moresponde kon adunay madawat nga reklamo sa ilang hotline.
Si PNP Chief Police General Camilo Cascolan nimando sa kapulisan lukop nasud nga ipatuman ang ordinansa sa matag lokal nga kagamhanan labot sa anti-noise ordinance, diin kadtong mga sound system nga makadisturbo sa pagpahuway sa mga tawo badlungon ang naggamit o pasakaan og kaso.
Mahimong disturbo sa mga bata ang kusog nga videoke sa ilang silingan panahon sa pagtuon ilabi na nga wa pay face-to-face nga klase.
Tungod niini, si Police Colonel Josefino Ligan, officer-in-charge sa CCPO, nimando usab sa iyang mga sakop nga robingan ang sudlunong bahin sa kabarangayan aron badlongon ang mag-videoke sa adlawan.
“During day time kay ang mga estudyante ang ilang klase naa sa sulod sa balay, adlawan na, maka disturb gyud,” matod ni Ligan.
Mahimong motawag sa CCPO hotline nga 0966-465-2556 ug 0918-268-2846 aron mabadlong ug mahatagan dayon nilag pagtagad ang reklamo sa usa ka residente.
Awhag ni Ligan sa mga Sugboanon nga abagan ang mga bata nga naningkamot nga makatuon nga way makabalda sa ilang pag-eskwela ning panahon sa pandemic.