COTABATO CITY -- Nailog sa mga sundalo ang dakong kampo sa mga terorista alas 5:00 sa hapon niadtong Miyerkules sa probinsiya sa Maguindanao.
Gibutyag ni 6th Infantry (Kampilan) Division Chief ug Joint Task Force Central Commander Major General Juvymax Uy nga nadiskubre sa 2nd Mechanized Infantry Battalion-Philippine Army ang lig-ong kampo sa Bangsamoro Islamic Freedom Fighters (BIFF) didto sa Sitio Talpok, Barangay Salman, Ampatuan sa nahisgutang probinsiya.
Narekober sulod sa kampo ang tulo ka anti-personnel mines, mga gamit sa paggama og bomba, bandela sa Islamic State of Iraq and Syria (ISIS), nagkadaiyang mga bala, medical kit ug 2 way radio.
Giingon nga ang kampo gipanag-iyahan sa grupo ni Kumander Salahudin Hassan sa Dawlah Islamiya Terror Group sa BIFF.
Gikanayon ni Uy nga ikapito na kini nga kampo sa BIFF nga nailog sa Joint Task Force Central sa diha nga nagsugod ang focused military operation niadtong miaging bulan.
Misaka na sab sa 16 ka BIFF, duha ka sundalo ang napatay ug daghan ang naangol sa katag-katag nga engkuwentro sa probinsiya tungod sa padayong paglutos sa Joint Task Force Central sa militar batok sa BIFF sa probinsiya. (Edgar E. Fuerzas)