PADAYON ang pagpailawom og lockdown sa Toril Police Station sa siyudad sa Davao human nga nagpositibo ang 30 nila ka mga piniriso.
Dunay say 13 ka mga pulis sa maong buhatan ang ipailawom sab sa swab test human ma-exposed sa mga priso.
Nasayran gikan kang Davao City Police Office (DCPO) Director Kirby John Kraft pinaagi sa DXDC-Tatak RMN-Davao nga dunay dul-an 100 ka pulis ang nadestino sa maong buhatan apan 13 lang ang giingong na-exposed sa mga piniriso.
Giingong human ma-swab test sa mga pulis, i-isolate sab sila diha sa DCPO samtang magpaabot sa resulta niini.
Kahinumdoman nga giingon ni DCPO spokesperson Police Captian Rosario Aguilar nga motuman sila sa protocol nga gipahigayon sa health department ning siyudad.
"Mo-abide kita sa protocol na gipahigayon sa health department sa City," ingon ni Aguilar nga nahinabi sa Superbalita Davao Huwebes, Oktubre 8.
Nasayran nga niadtong Oktubre 1, ang 32 ka mga priso sa Toril Police Station nakatakda nga ibalhin sa Davao City Jail sa Barangay Maa, apan dunay mga protocol nga kinahanglan masumite, sama sa negative results sa Covid-19, hinungdan nga gipang-swab test una sila.
Nianang adlawa, gipailawom sa swab testing ang 32 ka preso didto sa Sta. Ana Testing Center diin Oktubre 2, miguwa ang resulta ug nasayran nga 30 kanila nag-positibo.
Mga priso gibalik sa Toril Police Station ug gi-lockdown ang buhatan. (WGM)