GIPATULOG ni Mark “Thunder” Vicelles sa Omega Boxing stable si Junuel Lacar sa main event sa Kumbati 5 niadtong Miyerkules sa hapon didto sa IPI Sports and Recreational Sports Complex sa Barangay Casuntingan, Mandaue City, Cebu.
Mibuhi og makayanog nga straight left si Vicelles diritso sa apapangig ni Lacar nga maoy nakapatumba niini sa third round.
Wala na makabarug ang lumad nga taga Suriago del Sur nga si Lacar sa ihap sa referee.
Si Villeces nagpabiling walay pilde nga anaay record nga 12 ka daog ug usa ka tabla, samtang si Lacar nahagba didto sa walo ka daog, unom ka pilde ug tulo ka tabla.
Nalipay ang head coach sa Omega Boxing stable nga si Julius Erving Junco sa gipakitang performance sa iyang mga batos nga ni haros sa tanang upat ka duwa.
“They give their best. Hands down to my team. Mayta mo improve pa jud mi sa amo next fights. Daghan mi na kat-unan karon nga panahon di lang sa boxing kon di sa kinabuhi karon nga pandemic. We believe kini nga trials would make us better. Proud lang mi tanan nga naa mi sa Omega stable,” matod ni Junco.
Sa laing away ang featherweight nga si Pete Apolinar sa San Pablo, Laguna midaog pinaagi sa unanimous decision batok kang Jetro “Silent Operator” Pabustan.
Si Polinar mao ang sparring partner ni three-division world champion Naoya Inoue.
Ang maong daog maoy ika-11 ni Apolinar sa iyang pro career, aduna lang siyay usa ka pilde.
Samtang si No. 9 light flyweight contender Christian “The Bomb” Araneta (18-1 with 14KOs) milupig kang Richard Rosales pinaagi sa unanimous decision, ug Carlo Bacaro midaog pinaagi sa 5th round TKO batok Jeffery Stella.
Ang maong boxing event, nga giorganisar sa Omega Sports Promotions International (OPSI), mao ang unang pro boxing event sa nasod sukad nga nahunong ang paugnat sa kusog tungod sa hulga sa coronavirus disease (Covid-19).
“First of all, it was a fruitful and very challenging experience. We are thankful for the support of GAB (Games and Amusement Board), IATF and DOH and the City of Mandaue. Also to IPI for all their support. Kumbati 5 is done and dusted so we are looking ahead,” matod ni OPSI vice-president Jerome Calatrava.
Ang maong boxing event misunod sa mga lagda nga gipatuman sa Inter-Agency Task Force (IATF), Department of Health ug Games and Amusement Board.
Wala’y mga tumatan-aw sa venue ug gilimitahan lang kini sa mga boksidor, coaches ug ubang staff.
Plano ni Calatrava nga maghimo og laing fight card karong Disyembre ning tuiga.
Si Junco nangandam na para sa sunod away sa iyang mga boksidor. Matod niya nga kanunay kondisyon ang iyang fighters kay anaa man kini sa bubble sa ilang gym.