Barrita: Videoke ban sa adlawan

Barrita:Videoke ban sa adlawan

Tikdul-Tikdol

Uyon si Cebu City Mayor Edgardo Labella sa pagdili ug pagbadlong sa Cebu City Police Office (CCPO) sa videoke sa adlawan samtang gihimo ang mga modular, online ug offline classes sa mga pangpublikong eskuylahan.

Ang maong mga klase, wa na sa eskuwelahan, gihimo kini sa panimalay sa mga estudyante ubos sa superbisyon sa mga ginikanan. Gani, daghang mga ginikanan ang nireklamo nga mora’g sila maoy nibalik sa pag-eskuwela.

Kon idili ang videoke panahon sa adlawan, di na malinga ang mga ginikanan sa kanta-kanta sa videokehan. Ang tanan nilang panahon adto na igahin sa pagsuperbisar sa ilang mga anak, butang nga makaayo sa mga tinun-an.

Naglaraw ang mayor nga idili ang mga videoke sugod sa alas 8 sa buntag hangtod alas 5 sa hapon, gikan sa Lunes hangtod sa Biyernes. Moluwat siya og executive order nga maoy sundon sa kapulisan sa tumong nga di madisturbo ang mga estudyante.

Apan gikinahanglan ba gyud nga idili ang videoke panahon sa adlawan? Duna bay gihimo nga pagtuon sa mga kasuok-suokan sa dakbayan kon pila ka mga tawo ang manganta samtang hayag ug suwaw pa kaayo ang adlaw?

Nahibawo si Mayor Labella nga maihap ra ang mga tawo nga mag-videoke panahon sa kabuntagon o kahapunon kay sagad adto na sa kagabhion. Mas maayo pa nga ang mga ginikanan pahimangnoan nga unahon ang pagtuon sa ilang mga anak, di ang videoke.

Si PNP Chief Police General Camilo Cascolan maoy nimando sa kapulisan sa tibuok nasud nga ipatuman ang mga anti-noise ordinance sa mga lokal nga kagamhanan. Ipabadlong ang mga sound system nga makadisturbo ug pasakaan og kaso.

Ang Cebu City Ordinance 309 nga niamendar sa anti-noise pollution regulation, ang City Ordinance 1940, nagdili sa pagsaba-saba nga makadisturbo, lakip na sa mga “video karaoke sound systems and other similar sound-producing devices” gikan sa alas 7 sa gabii hangtod sa alas 5 sa buntag.

Ang makalapas niini multahan og P5,000 o usa ka tuig nga pagkabilanggo. Klaro ang mga oras nga gitagal. Kinahanglan pa kining amendahan kon ilakip pagdili gikan sa alas 8 sa buntag hangtod alas 5 sa hapon, gikan sa Lunes hangtod sa Biyernes.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph