Dili na gyud kalikayan ang paglambo sa teknolohiya. Ang kaniadto nga dako kaayong kalibutan, karon usa na lang ka gamay nga komunidad. Dali na ang komuniskasyon. Ang kaniadto nga komunikasyon maabtan tag siyam-siyam kay pinaagi lang sa suwat ug telegrama. Apan karon “on time” gyud ang communication. Magkita pa gani ang mag-estorya sa bisan asang suok sa kalibutan.
Labi pa karon nga Covid pandemic, ang mga meeting pinaagi na sa online o Zoom.
Dos bilyones ka mga tawo sa tibuok kalibutan ang nag-subscribe sa Facebook. Gani, ang Facebook gitawag na karon og “the new drug.” Hilabihan ka influential niini ilabi na natong mga Pinoy. Diin atong giila ang Facebook nga mao na ang internet ug ang internet mao ang Facebook. Ug dili malalis nga sa 16 milyones nga mibotar kang Presidente Duterte niadtong 2016 elections naimpluwensiya sa Facebook ug sa nagtubo nga “patriotic trolls.”
Suwayi og atake si Digong sa FB, di ba lamukon kag ataki sa iyang nga supporter sa FB.
Mga grupo mihulga ug miatake sa tanang mopagawas og sukwahi nga opinyon batok sa gobiyerno. Mao kini ang usa sa negatibo nga aspeto sa daghan unta kaayo nga bentaha sa FB. Kon ugaling gamiton na sa pagpanghulga ug pangatake sa mga mopagawas og sukwahi nga baruganan, nahulog nga dakong way kapuslanan ang maong teknolohiya nga inay mohatod kanato sa kalambuan, mopada-ilos na hinuon sa kapukanan.
Dili nato malalis nga dakog natabang kining FB. Adunay advantages ug adunay disadvantages. Ang uban wa nay punto ang paggamit kay bisan walay pulos, gi-post. Giabusuhan gani sa uban. Gihimong personal nga instrumento ug bisan ang mga personal nga butang nga dili angay nga ibutyag o ipagya sa publiko, ato nang makita diha sa social media.
Karong bag-o lang, nihulga si Presidente Duterte nga iyang i-ban ang FB dinhi sa nasud gumikan sa pagtangtang sa FB sa post sa kapulisan ug militar nga giingon nilang fake news. Nasuko si Digong kay ang gihimo sa management sa FB morag nagsuporta naman hinuon sa kaaway sa kagamhanan. Adunay mga nasud nga mi-ban sa FB sa ilang teritoryo, sama sa mga komunistang nasud sa China ug North Korea. Mahimo kaha na dinhi? Dili kaha magrebolusyon ang katawhan?