MOABOT na sa 40 na ka mga motorsiklo ang na-clamp sa mga sakop sa City Traffic Management System (CTMS) sukad sa ilang paglusad sa kampanya gikan sa Hulyo 2020.
Kini ang gipahibawo ni Mario Napule, pangulo sa CTMS. Matod niya, mao ni ang agi sa CTMS sa tulo ka buwan human gihingusgan sa kagamhanan ang pagpang clamp sa mga sakyanan nga pataka og parking sa pampublikong mga lugar.
Gipadayag ni Napule nga nagpailob ra unta sila sa mga nanag-iya ug sakyanan sa dakbayan nga magpataka ug parking apan aduna gayuy di mopatuo nga adunay nay ordinansa ang dakbayan kalabot niini ug aduna na usay clamp ang CTMS.
Sa talaan sa CTMS, niabot na sa 10 ka sakyanan ang gi-clamp sa Hulyo, 24 Agusto ug 16 sa Septyembre.
Ang multa malapason mokabat og 1,000, sumala ni Napule.
Gawas sa mga na-clamp moabot usab sa 49 ang na-tow sa kagamhanan gumikan gihapon sa susamang violation.
Dunay 9 ka sakyanan ang na tow sa Hulyo, 19 sa Oktubre, ug 21 sa Septiyembre.
Ang multa sa tow panahon sa gabii mobalor og P2,000 ug P1,500 sa adlawan.
Mopatong usab ang CTMS ug laing penalty nga P15 matag adlaw kun ugaling dugay makuha ang mga na tow apan gipadayag ni Napule nga kuhaon ra usab hinuon ang mga sakyanan dayon sa mga tag-iya human ma tow. Samtang, P150 ang impounding fee sa ma tow nga mga sakyanan.
Mga gipangtumbok ni Napule nga mga lugar sagad adunay mga illegal nga mo-park mao ang merkado sa Poblacion, Basak ug Marigondon. (GCM)