Serna: Batan-ong celebrities nga mga milyonaryo

Nakanga-nga ko sa dihang nilugwa sa akong browser ang listahan sa labing datu nga mga batan-ong artista sa nasud.

Ang listahan naglakip nila ni (akong gituyo paglahugay) Maine Mendoza, Kathryn Bernardo, Liza Soberano, Julia Barretto, Barbie Forteza, Nadine Lustre, Julia Montes, Daniel Padilla, Alden Richards, James Reid, Enrique Gil ug David Licauco.

Kinsay di makanga-ngá nga sa ilang kabatan-on mga milyonaryo naman ang mga kyampaw. Duna pa gyuy usa nga bilyonaryo na!

Ang naa sa labing ubos sa lista may net worth kuno nga P288 milyones samtang ang labing datu kay P1.3 bilyones ang net worth. Wow!

Mga inilog man sab gyud ni sila mao nga nagpusot-pusot ang proyekto. Maayo na lang gani kay kamao modala sa ilang kwarta kining mga artistaha.

Kadaghan na baya ta nakadungog ug nakakita sa mga istorya sa mga artista nga kanhi sikat kaayo apan sa dihang nawagtang na sa mapa, miserable kaayo ang pagpuyo.

Kadaghanan hinuon sa mga batan-ong artista, nisulod og negosyo mao nga nitubo pagsamot ang ilang pundo.

Maayo mo diha uy! Sana all!

Moangkon gyud ko nga usa ko sa daghang nagpaabot nga makabalik sa free TV ang mga programa sa ABS-CBN nga It’s Showtime, ASAP ug uban pa.

Mao nga dihang nagpahibalo ang network nga nakigkumboya kini sa Zoe TV nga gi-rebrand ngadto sa A2Z Channel 11, na-excite kog light.

Lakip sa mga Kapamilya stars nga na-excited ning maong kalambuan mao sila si Kim Chiu ug Tony Labrusca nga mga bida sa pelikulang “U-Turn.” Gikataho nga ang U-Turn mao ang labing unang pelikula sa Star Cinema nga ipasalida human gipakanaog ang quarantine sa tibuok nasud.

Hinaut nga madayon ang gikataho usab nga pag-abli sa mga sinehan nga katunga ra sa naandang gidaghanon sa mga tumatan-aw ang pasudlon. Hinuon, ipatuman lang gihapon ang mga health protocols sama sa pagsul-ob og face mask, pagpanghunaw og alcohol, physical distancing ug ang pagtino sa temperature sa tumatan-aw.

Mobalik na usab kaalegre ang palibot bisan pa nga gidili na usab sa syudad sa Cebu ang videoke panahon sa adlaw. Unsa man orasa makasugod og tiyabaw ug unsa orasa usab kutob?

Nakuyawan baya diay ang direktor sa bag-ong pelikula nga “Wonder Woman” nga mahimong mawagtang na sa kultura sa America ang pagtan-aw og sine sa sulod gyud sa sinehan tungod sa pagpasirado sa mga cinema tungod sa pandemiya.

Kini human ma-uswag katulo ang pagsalida sa Wonder Woman.

Hinaut nga maablihan na gyud ang mga sinehan dinhi sa nasud aron di usab mahitabo ang gikahadlokan sa direktor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph