NASAKPAN ang tigpayuhot og gidiling druga dihang shabu iyang gipasok sa lubot natagak tungod sa iyang pagsige og pangawot tungod sa pagpangatol niini.
Ang suspek mao si Nelson Celerio, 48, minyo, mamasurahay, ug taga Barangay T. Padilla, dakbayan sa Sugbo, gipusasan sa mga sakop sa Task Force Kasaligan sa Cebu City Police Office (CCPO) uban sa Parian Police Station 1, kagahapon sa buntag, Oktubre 8 sa Sitio Itom Yuta, Barangay Lorega, dakbayan sa Sugbo.
Lakip sa napusasan ang kakunsabo nga taxi driver nga si Jaymar Dejito Bagolor, 43, minyo, taga Hipodromo, dakbayan sa Sugbo.
Si Major Ardiolito Cabagnot, Battalion Commander sa Task Force Kasaligan nga nahinabi sa Superbalita Cebu, nagkanayon nga sila si Celerio ug Bagolor, nakuhaan og upat ka putos sa shabu, gibanabanang motimbang og dos gramos nga mobalor og P13,600 sa Dangerous Drugs Board (DDB) value.
Matud ni Cabagnot, nga ang iyang mga sakop sa Task Force Kasaligan, uban sa Parian Police Station 1 nagpahigayon og recorida sa mga interior portion sa Barangay Lorega sayo sa buntag.
Nakita nila ang duha ka mga lalaki nag-estambay sa gawas, unya kadudahan ang mga lihok.
Gisita sila kay nakalapas sa health protocol nag-estambay sa gawas wala gani magsul-ob sa mask, ingon man makapakita og dokumento.
Si Celerio, dihang gisita sa mga sakop sa Task Force Kasaligan, daw naratol, nagsige nalang sa pagkawot sa iyang bugan, sa lawas, og bisan unsa nalay ipang sulti.
Tungod niini, girikisa sila apan sige og kawot sa iyang bugan, hangtod nga natagak ang pinakite sa shabu.
“Kung wala lang siya nagsige kawot di unta matagak ang pinakite sa shabu, Sir. Iyaha man tong gipasok sa lubot” dugang ni Major Cabagnot.
Sumala pa niini nga si Celerio, kakunsabo niya ang taxi driver nga si Bagolor, kinsa mipadayag nga tungod sa pandemic wala na siya mamasahero.
Subay niini ang Task Force Kasaligan, nakasikop sab sayo kagahapon sa buntag sa usa ka ulitawo, nga nagbutang og shabu diha sa mask.
Si Emmanuel V. Cuizon, 24, taga dakbayan sa Naga, nakuhaan og pakite sa shabu sa iyang mask dihang hapit makadasmag og sakyanan sa may Ybañez Compound, Barangay Mambaling, dakbayan sa Sugbo.
Si Major Cabagnot nagkanayon nga nagbisiklita si Cuizon gikan nisuyop sa maong dapit ug paggawas niini, kusog nga nipadagan sa iyang bisklita hinungdan nga hapit makadasmag og sakyanan.
Gisita siya sa mga sakop sa Task Force Kasaligan ug naratol kini dihang gipangitaan og quarantine pass ug ubang dokumento sama sa ID. Ang iyang mask, ipahubo unta niini sa apan nagdumili.
Dihang gisusi sa mga sakop sa Task Force Kasaligan nasuta nga dunay pakite sa shabu.
Si Cabagnot nagkanayon nga na bisan unsa nalang ang modus sa mga durugista karong panahuna. / GPL