“WALA na lang unta na pusila. Gibunalan lang unta na.” Kini ang subo nga pamahayag ni Martin Ray Resuena human pusila sa ilang silingan ang ilang pinanggang iro nga si Bob pasado alas 11 sa Miyerkules sa buntag, Oktobre 7, 2020 sa Barangay Dumlog, siyudad sa Talisay.
Di nila pasayluon ang ilang silingan, ila kining pasakaan og kaso.
Sa video nga gi-post sa facebook account ni Resuena, makita ang lisud nga kahimtang ni “Bob” nga naghigda ug naa na sa lisud nga kahimtang tungod sa samad pinusilan sa walang kilid niini.
Ilang gitumbok ang ilang silingan nga si “Poying” maoy namusil gamit ang air gun.
Matod ni Resuena nga nakadungog silag buto sa armas ug sa ilang paglingi nakita nila nga nagdagan na paingon sa ilang balay si Bob nga nagping-it sa ka sakit.
Pag-abot sa sulod sa ilang balay, kalit lang nga natumba ang iro nga daw sa nakuyapan.
“Pagkabati namo sa buto, Sir, kalit lag dagan sa amoa among iro. Siya diay to ang gitiro. Pagduol niya sa amoa, kanang kabantay bitaw mi nga naghilak na siya nya pagtakilid niya, naay igo nga tinirohan sa iyang lower abdomen,” asoy ni Resuena sa Superbalita Cebu.
Dali nila nga gikomprontase si Poying nganong iyang gipusil ang iro, apan nirason kini nga napungot na siya sa iro tungod kay kanunay hasion ang iyang mga manok igtatari.
Daghan na, matod pa, sa iyang mga manok ang nangamatay tungod sa iro hinungdan nga naglagot siya niini.
“Dugay na ni niya nga ginainitan, Sir. Wala mi kahibawo nganong amoang iro ang iyang pasanginlan daw nga moatake sa iyang mga manok which is, Sir, naa man mi daghang manok diri nga bisag usa, wala man ni gihilabtang manok ang among mga iro diri,” dugang ni Resuena.
Gihulagway ni Resuena nga buotan si “Bob” nga usa pa ka tuig ang pangidaron.
Pinangga kini sa pamilya gani ang pagkaon niini adobong baboy nga luto sa iyang maguwang babaye aron maoy ipasud-an.
Tungod niini, desidido ang pamilya nga mopasaka og kaso batok kang Poying. Si Talisay City Police chieg Major Gerard Ace Pelare miawhag sa tag-iya sa iro sa pagdangop kanila aron mahimoan nila og aksyon.
Ubos sa Republic Act 8485 kun Animal Welfare Act, mga tawo nga manapat sa mga mananap mabilanggo og unom ka mga buwan ngadto sa duha ka mga tuig o momulta og P2,000 ngadto sa P5,000.
Dunay tinguha ang mga animal rights advocate nga umentuhan og dako ang multa kay alang kanila, gamay ra kini kaayo, di makapahadlok.
Ubos sa mao nga balaud, nalakip sa protected nga hayop ang iro ug iring. / AYB