ANG Cebu City Government ug tulo ka kasikbit nga mga local government unit (LGU) magtigom karong alas 2 sa hapon, Oktubre 9, 2020 aron higpitan ang seguridad para di makalusot ang mga kontrabando pinaagi sa delivery services.
Si Konsehal Joel Garganera, deputy chief implementer sa Emergency Operations Center (EOC), nagkanayon nga motambong ang security ug traffic heads sa dakbayan sa Lapu-Lapu, Mandaue ug Talisay sa meeting nga tambungan sa pulis ug Philippine Drug Enforcement Agency (PDEA).
Kini para adunay hiniusa nga lakang pagpakigbatok sa illegal nga drugas ug ubang matang sa kontrabando panahon sa modified general community quarantine (MGCQ) diin nauso ang delivery services.
Ang Cebu City, ubos sa executive order ni Mayor Edgardo Labella, nitugot na sa operation sa 24 oras nga delivery services sa pagkaon ug tambal ug alas 11 na sa gabii magsugod ang curfew sama sa Mandaue City apan kutob sa alas 5 sa buntag. / PAC