HIGH grade nga ecstacy nga gikan sa The Netherlands nga gipadala dinhi sa Sugbo alang sa usa ka lumolupyo sa lungsod sa Malabuyoc, nasakmit sa Philippine Drug Enforcement Agency (PDEA) 7 sa Huwebes, Oktubre 8, 2020.
Wa nila masikop ang babayeng tag-iya kay wa modawat sa shipment, apan ilang nahibaw-an nga kini usa ka drug surrenderer niadtong 2019.
Nahibawo ang PDEA sa shipment human nakigtambayayong kanila ang Bureau of Customs nga nagduda sa sulod sa package. Gibana-bana nga moabot og P841,000 ang ecstacy nga tabletas apil na ang mga raw materials sa paggama niini nga gituohang ari sa Pilipinas tiwason paghimo.
Si PDEA 7 Regional Director Levi Ortiz, sa press conference sa buntag sa Oktubre 8 sa gawas sa postal office sa lungsod sa Malabuyoc, nibukas sa package ug gipresentar kini uban sila si Mayor Lito Narciso Creus ug Cebu Police Provincial Office (CPPO) acting director Colonel Alladin Collado.
Matod ni Ortiz nga niadtong Septiyembre 2020, usa ka package niabot sa Sugbo nga alang sa usa ka residente sa Barangay Poblacion, Malabuyoc.
Nakabutang sa package nga ang sulod mga key chain.
Apan ang BoC nagduda sa package hinungdan nga ilang giablihan ug nasuta nga lahi ang sulod. Nakig-alayon sila sa nasudnong buhatan sa PDEA aron masusi ang mga tabletas.
“Ang Bureau of Customs man gud duna na sila mandato nga i-check ang mga packages hinungdan nga nasuta ang sulod,” matod ni Ortiz.
Dugang ni Ortiz nga ang nasudnong buhatan ni-test sa mga tabletas ug nasuta nga kini Methylenedioxymethamphetamine (MDMA) kun ecstacy.
Dugang ni Ortiz nga ang ilang head office nanawag kanila ug gipahibawo sa nadiskobrehan niini nga package nga dunay sulod nga mga ecstacy.
“So with the help of the PNP, we sent agents to the national office aron mohimo ta og controlled delivery kay naa man gud recipient ang maong package,” dugang ni Ortiz.
Gipugngan sa Superbalita Cebu ang mga ngan sa duha ka mga tawo, kinsang usa kanila taga dan J.P. Rizal sa Barangay Poblacion.
“Mao to nga atong gidala ang mga package diri sa Malabuyoc unya atong gipahatud sa post master. apan mi deny ang maong tawo nga maoy nakapangalan nga iya kadtong package,” matod ni Ortiz.
“Wala pa ta moari ha, nagpadala na ta og postmaster sa balay ug miingon siya nga dili na siya modawat og bisan unsa nga package. Pag-abot nato atong gipabalik ang postmaster aron ipahibawo nga naa ang package apan nagdumili gihapon siya sa pagdawat sa maong package,” pasabot ni Ortiz.
Sa imbestigasyon PDEA 7 ug kapulisan sa Malabuyoc sa babaye nga modawat unta sa package, nibutyag nga ang iyang ig-agaw mipahibaw kaniya nga di modawat og bisan unsa nga mga package. Si Ortiz nakahukom nga ipatawag ang ig-agaw sa babaye sa ilang buhatan aron maimbestigar.
“We will send her cousin a subpoena aron maimbestigahan kay nganong nakabalo man siya nga dunay sulod nga drugas ang maong bagahe?” matod ni Ortiz.
Gikompirmar ni Ortiz nga di ibaligya sa Malabuyoc ang ecstasy, kon di sa Dakbayan sa Sugbo.
Samtang si CPPO Provincial Director, Poiice Colonel Alladin Collado niingon nga nunot niining pagkasakmit sa ecstacy, pahugtan pa ang pakig- alayon sa ubang mga lugar.
Samtang gihangop ni Malabuyoc Mayor Lito Creus ang malampusong pagkapakgang sa suway nga paghulog og ecstasy sa iyang lungsod.
Gibutyag ni Creus nga usa ka surrenderer sa ilang lungsod ang padal-an unta sa mga ecstacy.
Nisurender kini sa programa sa kagamhanan pagbatok sa ginadiling drugas duha ka tuig na ang milabay.
“Surrenderer ni siya as user. Karon pa gyud ko ani nga naa diay in-ani, shabu-shabu lang to sa una,” matod ni Creus.