NABUNAL sa putlaw sa kilid sa trak, hinungdan sa pagkaputol sa ulo sa babayeng rider kinsa namatay sa nahitabong insidente didto sa Km. 67 National Highway, Barangay Tuboran, Mawab alas 7:10 sa buntag niadtong Huwebes, Oktubre 8.
Kini ang gibutyag ni Police Staff Sergeant Renato S. Marticion, imbestigador sa Mawab Municipal Police Station sa dihang nahinabi sa Superbalita pinaagi sa selpon Biyernes.
Matud pa nga ang biktima nga ginganlan og Donna Belle C. Caspillo, 23, dalaga, taga New Panay, Tulunan, North Cotabato ug lending collector nga maoy nagmaneho sa Honda XRM nga motorsiklo, dunay temporaryong plaka nga 1101-578377, gikan sa lungsod sa Nabunturan padung unta sa Siyudad sa Tagum.
Apan pag-abot sa nahisgutang lugar nahitabo ang insidente partikular sa kurbadang bahin human nawad-an og kontrol sa gimaneho niyang motor ug nabangga sa Isuzu Elf truck nga dunay plaka GDN 8856 ug gimaneho ni Zaldy De la Cruz Policarpio, 41, minyo, taga Purok 7, Bangkas Heights, Toril, Davao City.
Gisulti ni Marticion nga unang nalamba sa sira sa trak ang ulo sa biktima, dayon didto sa puthaw sa kilid sa trak nga miresulta sa pagkaputol niini.
Sa pagsuwat ning balita, ang drayber sa trak gikustodiya sa Mawab Municipal Police Station alang sa tukmang disposasyon sa kaso. (Dexter T. Visitacion)