Pipila nalang ang nagbarog nga lamp posts daplin sa kadalanan sa mga siyudad sa Sugbo, Mandaue ug Lapu-lapu. Wala nay kalag kay gihimulbolan sa kawatan. Sa 2007 gipahiluna kini daplin sa kadalanan nga agian sa mga delegado sa 12th Asean Summit.
Maisip nga monumento sa pangurakot ang maong nakontrobersyal nga proyekto nga giingong maneobra sa ulohang buhatan sa Department of Public Works and Highways (DPWH) ubos ni Sec. Hermogenes Ebdane panahon ni Pres. Gloria Arroyo. Apan gitrapo o gipahid sa DPWH 7, Mandaue Mayor Teddy Ouano ug Lapu-lapu Mayor Boy Radaza.
Ang engineering office sa Mandaue ug Lapu-lapu maoy nag-andam sa Program of Works and Estimates (POWE) apan inay street lighting giilisan og lamp posts nga gipaburot ang presyo hasta ka napulo ka pilo. Kay nasudnong proyekto, ang DPWH maoy naggunit sa kwarta ug nagsubasta alangsa paroyekto.
Gikan sa Ombudsman ang kaso giduso sa Sandiganbayan. Ang kasong kriminal batok kang Ouano ug Radaza gidismis sa usa ka dibisyon sa Sandiganbayan. Samtang gisalikway ang kasong administratiba sanglit “moot and academic” kay ubos sa Aguinaldo Doctrine nakalingkawas kay sila napili man pag-usab og posisyon sa gobyerno.
Subo lang palandungon nga naigo sa liti ug kilat ang pipila ka mga kawani sa DPWH 7 ug engineering office sa Mandaue ug Lapu-lapu. Idlas ug dangog ang DPWH sa kaulohan nga giingong maoy utok sa pagpaburot sa presyo sa lamp posts.
Human sa 13 ka tuig nga kalangay sa hustisya sa pangabuso sa pundo sa gobyerno migawas ang hukom. Sept. 24, 2020 ang Sandiganbayan mikonbikto sa tulo ka mga opisyal sa DPWH 7 nga si kanhi Regional Dir. Robert Lala, OIC sa Maintenance Division Pureza Fernandez, sakop sa Bids and Awards Committee Agustinito Hermoso ug Gerardo Surla sa Gampik Construction and Development Inc.
Sila gihukmang mabilanggo sulod sa unom ngadto sa walo ka tuig. Guilty sa kurapsyon subay sa iregularidad sa pagpamalit sa mga decorative lamp posts tataw nga kalapasan sa Anti-Graft and Corrupt Practices Act (RA 3019).
Mga poste ug suga mokabat og P35.6 milyunes nga wala moagi og subasta diin giila na daan ang winning bidder sa 120 ka sets nga suga pangdekorasyon sa Gampik Construction and Development Inc. Apan sa kwentada sa Ombudsman basi sa presyo sa merkado moabot og P12.6 milyunes ang pagpasobra sa presyo.
Kadtong dunay kaso sa pangawkaw makapaabot og silot. Hinay tinuod ang ligid sa hustisya apan nakab-ot ra gihapon. Naibtan sa tunok ang gipasanginlan nga walay labot. Bisan gidat-ogan na sa katuigan nasilotan ra. (csa_1156@yahoo.com / 09064648954)