Ang pagkaon maoy naghatag og enerhiya aron kita makalahutay sa atong inadlaw-adlaw nga mga tulumanon.
Apan kahibalo ka ba nga dunay mga pagkaong makahilo ug makamatay? Matod sa Bestie, Inc. apil ini ang kinhason, pasayan, kugita, buriring lakip mansanas, og hotdogs.
Sa ilang artikulo nga ‘Foods that can kill you’ kining mosunod ang mga pagkaong angay natong matngunan:
Una kining isdang Buriring kUn Pufferfish o Blowfish kay moburot kini sama sa balloon unya cute tan-awon apan nakakata-cute diay sama sa delicacy sa mga Hapon nga gitawag og Fugu gikan sa isdang’ buriring.
Kung di propisyunal o lisensiyado ang chef nga magpreparar ini, dilikado kini sa hilo kay duna kini Tetrodotoxin nga 1200 ka beses nga makapatay kung itandi sa cyanide. Gani, ang 1 ka buok ini makapatay na og 30 ka tawo.
Sunod kining shellfish sama sa kinhason o pasayan. Bisag taas kini og protina, mineral og good fats nga makapalagsik sa utok ug kasingkasing, mao sab kini kasagarang maka-allergy. Daghan sab ni sila og metal, mga contaminants ug bacteria tungod sa ilang kinaon. Aron malayo sa disgrasya, angay kining lutuon, di kilawon.
Hotdog! Kinsa man intawon ang di ganahan og hotdog, bata o tiguwang? Apan bisag wa ni silay makahadlok o makahilo nga kemikal, dilikado gihapon kini sa mga gagmay’ng bata kon matuk-an.
Sa gihimong pagtuon, 1 ka bata sa Amerika ang mamatay kada 5 ka adlaw unya usa sa mga rason mao ang pagkatuka sa gikaon. Angay hiwahiwaon og gagmay ang hotdog una ipakaon aron malayo sa disgrasya.
Mansanas. Murag di katuhoan kay usa kini sa labing healthy nga pagkaon apan ang iyang gagmay nga liso ini dunay amygdalin nga mopagawas og cyanide inig kaabot sa atong tiyan maong seguron gayod nga iluwa ang liso.
Sunod ang kugita. Sa Japan duna silay delicacy nga gitawag og Sannakji, ang pagkaon og buhing kugita nga nagkisi-kisi pa. Delikadong mo ilit ang mga kasway ini sa tutunlan o tilaok maong matuok unya di na kaginhawa.