Baha nakabara sa trapiko

TUNGOD sa pagsige og bundak sa uwan sa Dakbayan sa Talisay, duha ka mga paril ang nangahugno ug gibahaan usab ang karsada sa Barangay Linao.

Kini nimugna og pagkabara sa dagan sa trapiko sa barangay Linao niadtong Huwebes sa hapon, Oktubre 8, 2020 atol sa grabe nga pagbunok sa uwan lukop sa Metro Cebu.

Si Talisay City Councilor Ofelia Ylanan nga residente sa Barangay Linao niingon nga sud sa 37 ka tuig niya nga pagpuyo sa dapit, niadto pa nahitabo nga grabe ang kadaot nga gihatag sa uwan nga niresulta sa pagbaha sa ilang barangay.

Dugang ni Ylanan nga ang pipila ka mga koral sa iyang mga silingan nangatumpag usab gumikan sa natagamtaman nga baha.

Aron di mahasol og maayo ang mga lumolupyo, dali nga giihawanan sa siyudad ang nakababag nga mga tipaka sa paril.

BASURA

Usa sa mga dakong suliran sa barangay mao ang mga basura nga sagad nakabara sa agus sa tubig. Mao kini hinungdan nga dunay mga higayon nga mosuyla ang tubig gikan sa drainane system ngadto sa karsada.

Dinhi, ilang nadiskobrehan nga ang nakaingon sa baha mao ang pagkabara sa tubig sa drainage tungod sa nagtipun-og nga drainage.

Hinuon, ang suliran sa basura nga nakabara sa mga drainage system naandan nga problema, di lang sa Talisay City, kon di sa ubang mga dapit sa Metro Cebu, labina sa highly urbanized cities.

Samtang si Markyn Reyes, sakop sa City of Talisay-Traffic Operation Development Authority (CT-TODA), niingon nga dali sila nga niresponde sa lugar sa dihang nibundak ang uwan niadtong Huwebes tungod sa report sa pagkabara sa mga sakyanan.

Dunay mga sakyanan ang nangatanggong sa dan kay napagngan sa makina hinungdan nga ilang gipangduot aron di makaali sa trapiko. / BBT

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph