NIISYU na og executive order si Mayor Edgardo Labella para sa higpit nga pagdili sa videoke gikan sa alas 8 sa buntag hangtod alas 5 sa hapon gikan sa Lunes hangtod Biyernes.
Ang EO Number 100 maoy giluwatan ni Labella isip pagsuporta sa mga ginikanan ug tinun-an para di madisturbo ang ilang pagtuon sanglit nagsugod na ang klase ug sa balay ra nag-eskwela ang mga bata niining panahon sa modified general community quarantine (MGCQ).
“Students have started with their online and modular distance learning sessions at home while some employees continue to work from home” tipik sa EO sa mayor.
Ang EO ni Labella maoy nagsuporta sa City Ordinance Number 1940 nga maoy nag-regulate sa paggamit sa videoke sa tibuok dakbayan sa Sugbo.
“The same ordinance prohibits video karaoke machines: (1), within residential zones of the City as defined in the Zoning Ordinance,(2) in open spaces, (3), displaying , exhibiting or portraying ang lewd, pornographic, sexually suggestive or obscene images, among others,” dugang sa EO ni Labella.
Gumikan niini, ang mayor nakahukom sa pag-ban sa videoke sa adlawan, apan way labot ang Sabado ug Dominggo sanglit wa na usab kiniy klase ug wa say trababo ang government offices.
“In consideration, to these students and employees and upon the recommendation of the Cebu City Police Office, the City Government of Cebu finds it necessary to impose a ban on video karaoke machines/units during daytime on weekdays within the duration of MGCQ,” dugang sa EO.
Ang iyang EO magpalig-on sa lakang sa Cebu City Police Office (CCPO) sa pagdili sa videoke panahon sa adlawan tungod sa klase sa mga bata.
Si CCPO officer-in-charge Josefino Ligan nimando sa iyang mga sakop sa pag-roving sa interior portion sa mga barangay agi og pagtuman sa sa Camp Crame sa pagpatuman sa anti noise ordinance sa mga local government unit (LGU).
Tungod ning EO ni Labella, mas may ngipon na pagpanakop ang mga pulis ug mapahamtangan og silot ang makalapas. Ang makalapas makamulta og P5,000 o pagkabilanggo og labing minos unom ka mga buwan.
Sumala sa ordinansa, ang pagdili sa mga videoke o karaoke magsugod sa alas 7 sa gabii hangtod sa alas 5 sa buntag.
Si Police Regional Office (PRO) 7 Director Brigadier General Albert Ignatius Ferro nimando usab sa iyang mga city ug provincial director sa pagdili sa videoke sa adlawan nunot sa pagsugod na sa klase.
Apan si Ferro niawhag usab sa mga LGU sa pagluwat og samang EO aron mas duna silay legal nga basehanan sa pagbadlong ug pagdakop sa mga makalapas. /