ANG Cebu City Government mitugot na sa 100 porsiyento nga operasyon sa mga mall apan walay labot ang mga kalingawan hangtod sa alas 11:00 sa gabii matag adlaw.
Ang restaurants maka-atiman na usab sa ilang mga kustomer hangtod 75 porsiyento gikan sa kanhi 50% atol sa general community quarantine (GCQ) ug maka-serve og beer ug ubang klase sa ilimnong makahubog hangtod duha ka serves sa matag kustomer.
Ang mga sari-sari, convenient store ug ubang klase sa tindahan makabaligya og ilimnon apan dili mahimong mag-inom ang kustomer diha sa ilang lugar sanglit padayon kini nga gidili sa mga pampublikong dapit.
Kini ang mga pipila sa mga mahinungdanon ug kabag-ohan Executive Order Number 099 ni Mayor Edgardo Labella kinsa nitugot na usab sa 24 oras nga delivery sa pagkaon ug sa mga tambal.
Ang mga mall niabli og sugod dihang gipaubos sa GCQ status ang Cebu City apan ang ilang gipasulod hangtod ra sa 50% ubos sa EO ni Labella apan karon mahimo na silang makaatiman sa ilang full capacity inubanan sa istrikto sa minimum health protocol.
Lakip sa maka-operate og 100% sa ilang capacity mao ang government frontline services nga naa sulod sa mall, hardware stores, clothing and accessories, bookstore ug school supplies, infant care supply stores, pet shops, pet food ug pet care supplies, IT, communication and electronic equipment, flower, jewelry, novelty, antique, perfume shops, toy stores,music stores, art galleries ug firearms and ammunition.
Subay sa maong EO, epektibo ang curfew sugod alas 11 :00sa gabii hangtod alas 5 sa kadlawon matag adlaw niining panahon sa MGCQ.
Taliwa sa pagluag sa mga quarantine protocol sa Cebu City, si Labella padayon nga niawhag sa mga tawo nga batonan ang disiplina sa matag usa ug sundon ang minimum health protocol para malayo ug dili mataptan sa Covid-19. /