ABTIK kaayo ang kapulisan modakop og mga ginagmayng tigbakay. Apan, mahibulong kita nga dunay duha na derby ang napahigayon sa usa ka lungsod sa Metro Cebu. Gipasundayag pa gyud kini sa online.
Nganong wala man kini dakpa sa atong kapulisan? Wala gyuy pulis o asset nga nakahibawo nga dunay derby nga napahigayon sa lungsod? Basi sa atong nakuhang impormasyon, ang nagpaluyo niini mao ang tag-iya mismo sa coliseum.
Duha ra ang posibilidad nga nahitabo sa kapulisan. Banga lang gyud kaayo ang hepe. O dako-dako sab ang ilang bahin.
Hinuon, sigi na man hinuon kining online sabong sa nasyonal bisan pa og gidili. Mao nga makaingon kita nga dunay double standard karon. Okay lang kon mga adunahan ang magsabong. Pero kon mga ordinaryong mga tawo nga magtigbakay, aw way pasaylo oi.
ALAS 11
Makalibog lagi ning Executive Order 99 ni Mayor Edgar Labella ay. Iya nang gihimong alas 11 sa gabii makapanirado ang mga kan-anan sa Syudad sa Sugbo. Apan ang curfew magsugod og alas 11 sab.
Buot pa ipasabot ni Mayor Labella nga kining mga customer nga mogawas sa alas onse ug ang mga empleyado sa kan-anan magtanggong na lang sulod sa saradong kan-anan hangtod malibkas ang curfew sa alas 4 sa kaadlawon?
Di baya lalim ang madakpan og curfew. Dayon, kugihan kaayo ang kapulisan manakop.
Brayt gyud kaayo ka mayor.
ASA DAPIG?
Nakapangutana ko sa akong kaugalingon kon asa kaha dapig ang mga kongresista nga Sugboanon? Adto ba sila ni Speaker Alan Peter Cayetano? O naa ba sila ni Rep. Lord Allan Velasco?
Nanawagan man gud si Presidente Rodrigo Duterte og special session sa Lower House aron maresulba ang bugno nilang Cayetano ug Velasco alang sa pagka Speaker sa Kongreso.
Si Presidente Duterte man gud ang nakigsabot niining duha nga mag-term sharing sa pagka Speaker. Basi sa ilang sabot, mahuman na unta ang termino ni Cayetano karong Oktubre 2020. Apan, gipakita man gud ni Cayetano nga ang mayoriya dili gusto nga mokanaog siya.
Si Velasco karon niinsister nga naa kaniya ang mayoriya. Hangtod mahitabo ang usa ka eleksyon, di kita masiguro kinsa gyud kanila.
Apan asa kaha modapig ang mga kongresista sa Sugbo?
Sa pagkakaron, si Rep. Bebot Abellanosa lang ang naghisgot kon kinsa iyang gidapigan. Naa siya kang Velasco. Wa pa motingog ang uban.
Apan atong gipaabot nga silang Rep. PJ Garcia ug Rep. Duke Frasco naa kang Cayetano tungod kay dako sila og katungdanan sa administrasyon ni Cayetano diha sa Kongreso. (@anol_cebu sa Twitter)