MOABOT sa 3,058 ka mga drayber sa dakbayan sa Lapu-Lapu ang nipaubos sa libreng swab test nga gipasiugdahan sa Kagamhanan sa Siyudad gikan sa Septiyembre 30 hangtod Oktubre 9.
Sa kinatibuk-an, moabot lang sa lima ka mga drayber ang nagpositibo, apan aduna pa hinuoy gihuwat nga resulta ang kagamhanan.
Mao kini ang gipahibawo ni Grace Mary Carungay, epidemiological and surveillance unit officer sa kagamhanan.
Nunot niini, nakab-ot ra sa kagamhanan ang ilang target nga 3,000 ka mga drayber.
Gihangop ni Lapu-Lapu City Mayor Junard “Ahong” Chan ang pagkooperar sa mga drayber human nga minos ra unta ang nipaubos sa libreng swab test sa unang semana.
Ang tanang nipaubos sa swab test gitagaan usab og libreng vitamins aron pagpaglig-on sa ilang immune system.
Sunod semana, mga manindahay sa merkado na usab sa dakbayan sa Lapu-Lapu ang gusto nga ipaubos ni Chan sa libreng swab test.
Sama sa mga drayber, himuon gihapon kini nga compulsory sa tanang manindahay sanglit di mahimo nga makapaninda ug di mopaubos sa swab test alang sa kasiguroan sa mga mamalitay.
Nakita sa mayor ang pagdagsa sa mga nagpa swab test human siya mipahimangno sa mga drayber nga di kabiyahe kon di mopaubos niini.
“Pag-una, gamay ra ang mga nagpa test kay kahibawo na ka aning mga drayber, nagtuo sila lain ang ato test. Nagtuo sila i-drug test ba ron sila pero dili na mao. Mao susama usab ato panawagan sa mga vendor, we need their cooperation,” matod ni Chan.