SA PAGSUGOD sa unang semana sa klase, di lang ang mga estudyante ang nakasinati sa malisod nga kausaban sa sistema sa edukasyon panahon ning coronavirus pandemic, apan lakip sab ang mga ginikanan.
Pipila ka mga ginikanan sa Barangay Paknaan ang nahinabi sa Superbalita Cebu nipaambit sa ilang mga kalisdanan karon nga way face-to-face nga klase.
Si Avedrelda Castro, taga 6.5 Relocation Site, inahan sa duha ka mga estudyante, niangkon nga wa siyay salig sa iyang kaugalingon sa pagtudlo sa iyang mga anak kay high school graduate ra siya.
Iyang patudluon ang iyang igsuon nga graduating sa college ug nagtrabaho usab sa UCMed.
Apan gikinahanglan pa silang maghuwat sa pag-uli niini gikan sa gitrabahoan una pa matudloan ang mga bata, matod ni Castro sa interbyu sa Superbalita Cebu sa pagkuha niya sa modules sa Paknaan Elementary School.
Si Castro niingon nga bisan ang iyang mga anak nabag-ohan sa bag-ong sistema kay way maestra nga makatutok sa pagtudlo.
Matag gabii usa ka subject ang ilang tubagon uban sa iyang manghod.
Kada buntag, manawag sila sa maestra pinaagi sa cell phone aron matudloan og ginagmay ang mga bata.
Alang ni Castro nga mas uyon siya nga sa eskwelahan tudloan ang iyang mga anak aron mas makat-on ug matutukan ang ilang pagtuon.
Gani dugang niya nga lisod sab sa mga ginikanan, labi na sa mga dunay trabaho, tungod kay mabiyaan.
WAY GADGET
Si Pamela Dela Cruz, taga Barangay Paknaan, adunay unom ka mga anak, niangkon nga naglisod sab siya sa pagtabang sa iyang mga anak sa ilang mga module.
Sigon niya nga ang iyang mga anak magtinabangay sa pag-answer sa ilang modules, diin ang mga maguwang maoy motudlo sa mga manghod.
Ang iyang mga anak anaa sa Grade 1, Grade 4, duha sa Grade 7, Grade 8 ug Grade 11.
Ang unom ka anak ni Dela Cruz puro nag module tungod kay wa silay gadgets o selpon nga mamahimong magamit sa iyang mga anak.
Matod niya nga adunay mga higayon nga maghilak ang mga manghod tungod kay maglibog sa ilang mga anseranan.
Adunay higayon sab nga sapoton ang mga maguwang ug makasab-an ang mga manghud tungod kay di dayon makasabot.
Mo-contact sab si Dela Cruz ngadto sa mga maestra kon adunay mga leksyon o anseranan nga di nila masabtan.
Gani, motabang si Dela Cruz sa pagpasabot sa mga leksyon ngadto sa iyang mga anak.
“Ubay-ubay gyud nga tudloanan pero unsaon ta man, inahan man ko. Ako gyud nang paninguhaon para maka-eskwela lang,” saysay ni Dela Cruz.
TAWGANAY, CHAT
Sa pakighinabi sab sa Superbalita ni Ana Fe Luna, usa ka adviser sa Grade 6 sa Paknaan Elementary, siya niingon nga sa unang semana sa klase, pipila na sab ka mga ginikanan nga mangutana ngadto nila aron pagpasabot sa modules.
Matod niya nga mihatag ra sila sa ilang number ngadto sa ginikanan ug aduna sab silay group chat diin didto sila mag monitor ug motubag sa mga pangutana sa mga ginikanan.
Bisan unsang orasa pa mo-contact ang mga ginikanan, matod ni Luna nga andam ra sila nga motubag.
Gani, adunay mga ginikanan nga mo-contact nila og tag alas 9 na sa gabii.
Dugang niya nga alang sa Math, diin lisod gyud kini i-explain sa chat o text, maghimo og videos ang mga maestra kon unsaon pag-solve isip giya sa mga estudyante sa pag-answer.
Sa laing bahin, matod ni Nimfa Bongo, nangulo sa Department of Education Mandaue Division, nga sa una pa nga semana sa klase aduna nay nahitabong mga kalamidad nga pagbaha ug pagkasunog sa Barangay Paknaan ug Barangay Labogon, naka-apekto sa mga estudyante, labi na sa pagkaguba sa modules.
Matod niya nga wala ra silay problema sa pag-printa balik sa modules tungod kay aduna silay igong supply, apan naanugnan sila sa oras sa mga maestra, ginikanan ug estudyante diin magprinta og balik, mag-distribute ug mag-answer na sab balik sa modules.
Nanghinaot si Bongo nga wa nay moabot nga susama nga mga kalamidad, apan kon aduna man gani, nipahimangno siya sa mga ginikanan nga ibutang sa luwas nga lugar ang mga module.