GARBO nga ipahibawo ngadto sa mga certified nga mga hinuroy ang resort nga nahimutang sa 4th class municipality sa lalawigan sa Leyte nga dekalidad nga kasuroyan ug kalingawan nga haom sa mga local o international tourist.
Kini ang Ocean Pearl Cove Resorts nga naa sa Barangay Inangatan, Sitio Tabayla, Tabango Leyte, 6 kilometros gikan sa town proper nahimutang sa usa ka coastal area.
Gikan sa town proper, mamahimong mosakay og single nga motorsiklo o pribado nga mga sakayanan kay duna man silay parking space, apan walay mga de pasahero-an nga sakyanan nga naka-standby.
Nagsugod sa pag-operate niadtong tuig 2012 human nakompleto ang tanan nga mga permits.
Tuig 2013 nahitabo ang bagyong Yolanda nangadaot ang ubang pasilidad apan sa tuig 2014, dali nga nakabalik sa normal nga operasyon ang resort pero wa didto natapos ang krisis nga giatubang sa Ocean Pearl.
NA-IGO SA COVID
Marso 2020, temporaryong gisirhan ang Ocean Pearl sa dihang mideklarar si Presidente Rodrigo Duterte og State of National Health Emergency tibuok Pilipinas tungod sa coronavirus Disease (Covid-19), ang mga lokal nga kagamhanan mihimo usab og kamanduan nga temporaryo nga ipasira ang mga tourist spots sama sa resorts sa ilang tagsa-tagsa ka mga lugar.
Usa sa naapektuhan ang Ocean Pearl ug pipila sa ilang mga trabahante ang temporaryo nga walay trabaho tungod kay nawad-an usab og kita ang resort.
Misaad ang management nga ibalik ra gihapon ang mga trabahante kung mag-abli na pag usab ang resort.
Bisan nga nawad-an og trabaho wala pasagdi sa management ang ilang mga trabahante kay naghatag sab sila og hinabang ug ubang ayuda.
Sa wala pa ang pandemya matag adlaw daghan ang mobisita sa resort.
AMENITIES NGA NAA
Daghan og ika-offer ang Ocean Pearl, depende nimo kung gusto lang ka mag-relax o magpahayahay lang or gusto ba nimo og sports activity.
Naa silay mga rooms kon gusto ninyo nga mo check-in, dunay standard, standard twin, deluxe ug superior rooms.
Naa sab silay capsule ug dorm rooms nga maka-accommodate og daghang tao, limpyo, hapsay ug komportable.
Nindot usab ang ilang facilities, naay boardwalk, lounge, atlantic, arctic ug pacific hall, volleyball court, gymnasium, restaurant, swimming pool, sea pool, kapihan, playroom, chapel, M1, M2, M5 ug M6 cottages, mushroom cottages ug airconditioned KTV room.
Mo-offer sab sila og catering services ug transportation services sa ilang mga bisita ug daghan na usab nga mga dagko nga meetings, seminar ug kasal ang gipahigayon na sa Ocean Pearl.
Matod ni Edsel Sanico, manager sa resort, naa sab sila usahay disco ug live band sama nalang kung naay espesyal nga okasyon ilabi na sa Pasko, Valentine’s Day ug ubang mga okasyon.
Ubay-ubay na sab nga celebrity ug mga sikat nga personalidad sama ni Tony Labrusca ang niduaw sa resort.
Ongoing na usab karon ang plano sa management nga naa nay regular nga international food nga i-serve sa mga bisita.
“Mao nay giplano karon kay daghan man sab mga foreigners mobisita pero kung naa lang mag-request like Italian or unsa nga international food, pwede mi makaluto.
“Wala pa lang gyud regular unlike sa Filipino foods nga mao gyod naa nato diri,” matod ni Sanico.
WATER SPORTS
Di sab magpaiwit ang ilang makalingaw nga water sports activities, sama sa jetski, banana boat ug flying fish. Naa sab silay speedboat, kayaking, stand-up paddle ug pedal boat.
Para sa mga magbarkada, pwede sab sila mo-offer og island hoping sa Duwahon Island, Kalanggaman Island, Sambawan Island ug Malapascua Island.
BUKSAN PAGBALIK
Oktubre 2020, gideklara na sa National Inter Agency Task Force (NIATF) nga under Modified General Community Quarantine (MGCQ) ang Leyte apil na ani ang lungsod sa Tabango .
Matod ni Sanico, giplanohan na karon sa management ang pag-abli sa resort sa dili madugay aron makabalik og serbisyo sa mga turista ug makatabang pagpabarog sa ekonomiya tungod sa Covid-19.
Wala pay tukmang petsa ang pag-abli kay gipaabot nalang sa management ang mando sa lokal nga kagamhanan.
Andam sab ang Ocean Pearl nga motamod sa mga lagda aron paglikay sa Covid-19 sa ilang pagbalik og abli.
CONTACT DETAILS
Sa mga nagplano mobisita sa Ocean Pearl Cove Resorts, pwede ninyo sila ma-contact sa email address nga oceanpearl_reservations@yahoo.com.Naa sab sila’y Facebook page nga Ocean Pearl Cove Resorts Inc. (Mga hulagway tampo sa Ocean Pearl Cover Resort)