Kap. Usman mohatag og reward

ARON mapabilin ang kahapsay ug kalinaw sa Barangay 23-C, Isla Verde, Poblacion, Davao City, mohatag og rewards nga salapi ang barangay sa mismong makasumbong kinsa kadtong magdala-dala og pusil, hinagiban, eksplosibo ug uban pa nga maoy mobungkag sa kalinaw sa barangay.

Mismong si Barangay 23-C Kapitan Alimoden "Wating" Usman ang nangusog nga mohatag og P20,000 sa tawo nga makasumbong nga dunay magdala-dala og pusil ug mga hinagiban nga maoy hinungdan sa kasamok.

“Ang Barangay 23-C mohatag og rewards nga P20,000 sa mga tawo nga makasumbong kinsa nang nagdala-dala diha og pusil, granada, mga eksplosibo, hinagiban ug uban pa nga maoy momugna og kasamok diri sa atong barangay,” ingon ni Usman sa pakighinabi sa mga tigbalita niadtong Biyernes, Oktubre 9, 2020.

Dugang ni Usman nga usa kini ka pamaagi aron mapabilin ang kahapsay ug kalinaw sa Barangay 23-C gumikan kini ang ikaduha nga gikonsiderang pinakadaghang populasyon nga misunod sa Barangay 76-A, Bucana.

Kabahin sab kini sa pagpakusog sa programa sa kapulisan sa Davao Region nga Revitalized Pulis sa Barangay.

Nanghinaut si Usman nga human sa mga pagsulay nga dala niining coronavirus disease (Covid-19), mabalik ang kanhi normal nga panginabuhi ug direksyon sa katawhan sa Isla Verde diha sa matag adlaw.