PATAY ang tricycle driver ug usa ka sakop sa Citizen Armed Force Geographical Unit (Cafgu), samtang samdan sab ang namusil kanila sa Kim James Subdivision, Barangay Poblacion, Maragusan alas 4:45 sa Biyernes sa hapon, Oktubre 9, 2020.
Ang mga biktima mao sila Roy Baquero Tenaja, 42, minyo, tricycle driver, molupyo sa nahisgutang dapit; ug Jonel Compoc Verano, 31, ulitawo, sakop sa Cafgu ubos sa 66 Infantry Battalion ug molupyo sa Sitio New Cebu, Barangay Magcagong, Maragusan.
Base sa inisyal nga imbestigasyon, samtang ang mga biktima atua sa kilid sa basketball court sa maong dapit, ang suspek nga ginganlan og Henry Baculi Zabate, 40, ulitawo, taga Mt. Diwata, Monkayo miduol kanila ug mihulbot og armas dayon gipusil ang biktima nga si Tenaja kinsa naigo sa nagkadaiyang parte sa lawas.
Samtang ang biktima nga si Verano mihulbot sab sa iyang armas ug gipusil ang suspek kinsa naigo sa tuong bukton, apan ang suspek mibanos pagpusil og naigo sa taas nga bahin sa iyang paa si Verano.
Human sa insidente, ang suspek naglakaw nga mipalayo apan naaresto sa mga miresponding pulis.
Narekober gikan sa posesyon sa suspek ang usa ka unit nga armscor caliber .45 pistol nga dunay serial number 959876 uban sa nakapaslak nga basiyong magazine.
Ang suspek ug ang mga biktima gidali pagdala sa Davao De Oro Provincial Hospital-Maragusan apan, ang duha ka biktima gideklarang dead on arrival sa doctor nga mihiling samtang ang suspek gi-refer sa Davao Regional Medical Center alang sa dugang medikasyon.
Motibo sa krimen gisusi sa kapulisan sanglit nagpadayon pa ang ilang imbestigasyon. (Dexter T. Visitacion)