MAHIMONG makagawas ang senior citizens sa balay basta ubanan sila sa ilang ginikanan.” Pasiaw ni nga migawas nunot sa pagdili sa senior citizens sa paggawas sa balay atol sa Covid-19 pandemic kay sila ang labing daling takboyan sa maong sakit.
Ang pangutana sa kapin sa 80,000 ka mga senior citizen sa siyudad sa Sugbo mao nga mahimo ba silang makagawas sa ilang mga panimalay. Bisan si Cebu City Vice Mayor Michael Rama gusto nang ilibkas ang quarantine ban sa mga senior.
Si Rama, nga mag 66 na sa hinapos ning buwana, niingon, “Di man intawon igat ang mga seniors oy.” Nakalimot siya sa pasiaw nga dunay gitawag nga mga TI, mga “tiguwang igat.”
Gidid-an sa paggawas sa balay sa lagda sa Inter-Agency Task Force for Managing Emerging Infectious Diseases (IATF-MEID) kadtong nagpanuigon og 21 anyos paubos, 60 anyos pataas, kadtong dunay comorbidity ug compromised immune system ug mga babayeng nagsabak.
Ang maong ban nagpilit sa tanang matang sa community quarantine nga gipatuman tungod sa Covid-19, gikan sa enhanced community quarantine (ECQ), modified enhanced community quarantine, (MECQ), general community quarantine (GCQ), ug modified modified general community quarantine MGCQ. Apan dunay mga exception niini. Mahimo silang mogawas sa balay alang sa essential goods and services sama sa pagpalit og pagkaon og tambal, pagtrabaho sa gitugotan nga mga industriya ug sa ubang kalihokan nga gitugotan na sa mga lagda.
Apan bisan kon makagawas ang senior citizens subay sa exceptions sa mga lagda sa IATF, kinahanglang gihapon ang pagsul-ob sa face masks ug face shields. Mapaabot sab nila nga sukit-sukiton sila sa kapulisan bahin sa ilang tumong sa paggawas sa balay. Si Cebu City Mayor Edgardo Labella, nga 69 anyos na ug maguwang ni Mike Rama, niingon nga gimandoan ang kapulisan sa di mag-inistrikto sa seniors. Ambot lang kon gituman ba kini sa kapulisan.
Ang klaro nga nagpabilin ang stay-at-home order sa senior citizens. Apan way lockdown sa senior citizens. Wa sila ibutang sa halwa ug mahimo silang mogawas kon importante ang tuyo, di kay sa pulong pa ni VM Mike Rama, “pag-igat-igat” lang.