USA ka balaudnon nga magtukod og commercial airport sa Camotes ang gisang-at ni Rep. Vincent "Duke” Frasco sa Kongreso aron paghatod og kalamboan sa mga isla.
Dugay nang katuigan nga ang Camotes gidagsa sa mga turista tungod sa maanindot nga baybayon, langub ug uban pang tourist spots apan hangtod karon, lisud gihapon ang pag-adto sa maong lugar.
Adunay airstrip ang San Francisco, Camotes apan wala pa kini gigamit isip commercial airport.
Ang airport nakita nga usa sa mga yawe aron molambo ang ekonomiya sa isla.
“Hangtod karon, pagsakay sa barko ra gyud ang paagi aron makaabot sa isla. Usahay, delikado kining paagiha kung bati ang panahon, dagko ang bawd. Kini maoy usa sa nakapugong sa padayon unta nga pag-asenso sa mga lungsod sa Camotes,” matod ni Frasco.
Ang Camotes adunay upat ka mga lungsod. Mao kini ang San Francisco, Tudela, Poro ug Pilar. Ang planong pagtukod ug domestic commercial airport alang sa mga mga isla subay sa prayoridad nga “Build, Build, Build” program ni Presidente Rodrigo Duterte.
“Ang katumanan sa maong airport maghatod ug kalamboan sa Camotes, ug maghatag og dugang oportunidad sa katawhan didto nga makakita og panginabuhi pinaagi sa dugang higayon makatrabaho o makanegosyo,” pag-esplikar sa kongresman.
Sa House Bill 7847 nga iyang giduso, ang pagtukod og 1.8-kilometer nga airstrip sulod sa 27 ka ektarya nga airport makatabang pagsulbad sa kahuot sa trapiko sa Mactan airport. (PR)