NAGKALAINLAING vendor associations sa dakbayan sa Sugbo kinahanglan motuman sa health protocol kon ugaling makapamaligya na sila og balik.
Si Cebu City Councilor Dave Tumulak, chairman sa task force nga gihimo ni Mayor Edgardo Labella, miingon nga estoryahan pa sa task force ang maong proposal sa mga mamaligyaay.
Ang chairman sa Cebu City United Vendors Association (CCUVA) nga si Maria Pino miingon nga isiguro nila nga matuman gyud ang health protocols, labi na ang social distancing policy, kon tugtan na sila nga makabaligya og balik.Para mapatuman ang social distancing, kinahanglan nga adunay one-meter nga distansya ang matag stall, apil na sab ang mga mamalitay.
Si Pino niingon nga mamahimo sab nga magpulipuli ang mga manindahay pinaagi sa odd-even numbers scheme aron masunod gyud ang social distancing.
Kinahanglan magsul-ob og face masks ug face shield ang mga manindahay ug kinahanglan mag-andam og alcohol alang sa mga mamalitay ug para sab nila.
Ang stall kinahanglan adunay plastic cover aron ma-minimize ang physical contact sa mga mamalitay ug manindahay.
Kinahanglan mogamit og tray ang manindahay aron didto ibutang ang bayad sa mopalit.
Kon adunay igong lugar, mahimo sab magbutang og handwashing area sa lugar.
Ang mga manindahay kinahanglan ipabilin ang kalimpyo sa ilang lugar ug sa palibot sa dili pa ug sa paghuman sa pagpaninda; mag-disinfect bisan kaisa lang sa usa ka semana; ug tanang stall kinahanglan adunay nakabutang nga reminders sa health protocols.
Alang sa mga manindahay og pagkaon sama sa pungko-pungko, kinahanglan i-limit ang mga tawo nga mamahimong mo-dine in aron maobserba ang social distancing.
Magbutang usab og plastic shield sa matag lamesa sa mga mokaon.
Kon way igong espasyo ang lugar sa pagkaonan, kinahanglan take-out orders lang ilang dawaton ug di pwede ang dine-in.
Ang mga manindahay kinahanglan magsul-ob og apron, hair net, ug hand gloves.
Alang sa mga tig-ayo og relo, nipper, ug uban pa, kinahanglan tag-usa lang ka customer ang ilang dawaton ug kini hatagan og lingkuranan samtang maghuwat.
Kon way igong espasyo alang sa lingkuranan, giawhag ang pagpabilin lang sa gamit ug balikon lang kini kon mahuman na.
Ang tig-ayo kinahanglan adunay logbook kon diin didto ibutang ang pangalan sa customer, adlaw ug oras, ug ang detalye sa butang nga ibilin.
Giawhag sad nga kon mahimo, kuhaan og hulagway ang customers sa item nga gibilin.
Matod ni Tumulak, mag-meeting ang task force sa Oktubre 13, 2020 aron pagtuki sa maong proposals sa mga manindahay.
Kon mamahimong makabalik ang mga manindahay, matod niya, adto lang sa mga lugar nga dako’g espasyo aron maobserba ang social distancing.
Gidugang niya nga ang pagpabalik sa mga manindahay kay subject pa sa approval sa Department of the Interior and Local Government (DILG).
Kon unsay masabotan sa task force, ipada pa kini kang DILG Secretary Eduardo Año.
“We understand baya that these vendors need livelihood, but it’s not only a decision of the local government unit, it also needs a decision of the DILG,” sigon ni Tumulak.
Niadtong Pebrero 2020, nagpagawas og memorandum ang DILG ngadto sa local chief executives nga padayon pa gihapon ang implementasyon sa road clearing. (JJL)