ANTIGO o karaang imahen ni Birhen Maria nga nagkugos sa batang Jesus sa kapilya sa Sitio Manggubat, Barangay Arbor, lungsod sa Boljoon gikawat niadtong Biyernes, Oktubre 9, sa alas 11:00 sa buntag.
Apan naluwas ug nabawi ang imahen human ang nasakyang habalhabal sa kawatan asset sa pulis, kinsa nitaho dayon sa presinto.
Naabtan sa kapulisan sa terminal sa bus ang suspek nga si Franz Xavier Abala, 25, ulitawo, taga Cabreros St., Barangay Basak San Nicolas ug nagpailang mamalitay og mga antique nga santos.
Narekuber sa kapulisan ang antique nga Birhen Maria nga nagkugos sa Batang Jesus.
Si Police Corporal Erwin Oyao sa Boljoon Police Station nga nahinabi sa Superbalita Cebu, nagkanayon nga usa nila ka asset nga habalhabal driver maoy nipahibalo sa ilang buhatan.
Ang maong habalhabal driver mibutyag nga nagduda siya sa iyang pasahero nga mipakyaw kaniya nga dunay gikuha sa likod sa kapilya sa Arbor.
Ang maong habalhabal driver mitug-an nga gipakyaw siya sa usa ka batan-ong lalake ug gibayran og P200 nga plite pag-adto sa lugar ug pagbalik.
Gihatud niya sa atangan og bus sa maong lungsod apan milahos siya sa police station kay nagduda siya.
Pag-abot didto sa may kapilya sa Brgy. Arbor, ang suspetsado misulti kaniya nga hunong una kay kaihion siya.
Miadto kini sa likod sa kapilya kay mangihi apan pagbalik niini, dunay gibitbit nga eco-bag, dinhi na siya nagduda.
Human makuha sa kapulisan ang impormasyon gidali sa pag-adto ang suspetsado kinsa nagpaabot og busnga molarga paingon sa dakbayan sa Sugbo.
Sa pagsita nila, ilang nakita sa sulod sa eco-bag ang t-shirt nga green, giputos niini ang imahen ni Mama Mary.
Gisignit nila ang suspetsado human wala na magkadimao ang iyang pamahayag.
Si Police Executive Master Sgt. Rogelio Fernandez, officer-in-charge (OIC) sa Boljoon Police Station nga nahinabi sa Superbalita Cebu, nagkanayon nga ang antique nga santos nga imahen ni Mama Mary naa na sa 90 ka tuig ug mobalor og P30 mil.
Sumala ni Fenandez, ang suspek mitug-an nga nagtrabaho isip manahiay’g sapot sa mga santos.
Deboto sab siya sa patron sa lungsod sa Boljoon nga si Señor Patrocinio de Maria.
Siya sab ang tigtahi sa mga gamit sa santos sa lungsod. Gani, dunay usa ka sakristan nga iyahang kaila.
Gitug-an niini nga usa ka ginganlag “Norma” ang nisugo kaniya nga ipakuha ang Virgin Mary kay patahian og bag-ong sinina.
Apan wala motuo niini ang kapulisan kay walay Norma nga taga Arbor.
Kini ang gibutyag sab sa presidente sa kapilya nga si Niven Medrano, 45, kinsa maoy mopasaka sa kasong pagpangawat batok sa suspek.
Nagtuo si PEMS Fernandez, nga dunay mga kakunsabo si Abala sa iyang kalihukan sama sa nakuha nilang mga picture sa selpon niini nga dunay mga hulagway sa santos.
Makita sab sa mensahe sa selpon ang mga komunikasyon sa pagbaligya niya sa mga santos, dili lang dinhi sa Sugbo, lakip sa Bohol.
Sigon ni PEMS Fernandez nga palawman pa nila ilang imbestigasyon ug makig-alayon sila sa ubang mga lungsod ug dakbayan pagsuta kon wala bay mga nahitabong pagpangawat sa ilang mga simbahan.
Ang Superbalita Cebu nakighinabi sa suspek apan nagdumili kini kay gibauran siya sa iyang mama ug papa. (GPL)