SUPERBALITA DAVAO

Roldan: Partido Demokratiko Pilipino (PDP) (Ikaduhang bahin)

Nota Bene

KUNG walay dakong kakulian, ipahigayon ang General Assembly sa PDP Davao City Council karong Disyembre. Kini ang partido ni PRody Duterte ug maoy pinakadakong partidong politikal sa nasud.

Apan kanus-a ug nganong natukod kining partido? Matud pa sa basahon sa Philippine Wikipedia, natukod ang PDP niadtong Pebrero 6, 1982 didto sa Cebu City nila ni kanhi Senador Aquilino "Nene" Pimentel ug grupo nga nakigbatok sa awtokratikong pamunoan ni Presidente Ferdinand E. Marcos, ang ika-10 nga pangulo sa Pilipinas, ug ang iyang Kilusang Bagong Lipunan (KBL) party.

Daghang taga-Davao ang nahiapil niini sama nila ni Zafiro L. Respicio, Rey Magno Teves, Cesar R. Ledesma, Samuel Occe├▒a, Crispin Lanorias ug taga Cagayan de Oro nga si Mordino Cua.

Niadtong 1983, nakig-abin ang PDP sa Lakas ng Bayan (Laban) Party nga natukod niadtong 1978 nila ni Nene Pimentel Jr., Olongapo City Mayor Teodoro Macapagal ug Rodrigo Ma nga nahimong pinakadako nga grupo sa oposisyon nga hakigharong batok ni Marcos sa 1986 "Snap Election."

Aron mas kusgan pa ang oposisyon, nakig-alyansa ang PDP-Laban sa United Nationalist Democratic Organization (Unido) ni Senador Salvador Laurel diin nahimong nominado sa partido si Cory Aquino ug Salvador Laurel pagka-bise president nga maoy nidaug sa maong pinilaay.

Nagpadayon ang alyansa sa PDP-Laban ug Unido hangtod nga nabungkag ang naulahi sa tuig 1987. Niadtong 1988 natunga ang PDP-Laban sa duha ka paksyon, ang Pimentel Wing nga gipangulohan ni Nene Pimentel Jr. ug ang Cojuangco Wing nga gipangulohan ni Jose Cojuangco Jr.

Sa mao gihapong tuig, nakig-abin ang Cojuangco Wing ug ang Lakas ng Bayan Party ni House Speaker Ramon Mitra Jr. aron tukuron ang Laban sa Demokratikong Pilipino (LDP). Sumala sa basahon, nangandoy ang partido sa usa ka malinawon ug demokratikong paagi sa pamuyo diin anaa ang kaugalingnan, pakiglambigit sa uban, hustisya, kaangayan, responsibilidad, ug pagsalig sa kaugalingon.

Gigiyahan kini sa lima ka prinsipyo sama sa pag-ila sa usa ka labaw'ng makagagahom (theism), matuod nga pagka-makatawhanon (authentic humanism), binanwagan nga pagmahal sa nasud (enlightened nationalism), makisalmuton nga demokrasya (participatory democracy) ug demoktatikong sosyalismo (democratic socialism).

Buot usab sa partido nga usbon ang porma sa panggobyerno gikan sa "unitary system" ngadto sa pinderal o "semi-presidential parliamentary." Ang nahaunang "logo" sa partido hangtod sa 2016 mao ang walang palad sa kamot nga adunay debuho ni Lapulapu samtang nadugangan kini karon sa "Duterte's fist."

Ang mosunod nga opisyal sa partido nga giila sa Comelec mao si: Aquilino "Koko" Pimentel III-national president, Rodrigo Duterte - national chairman, Alfonso Cusi - vice chairman, Jorge Bernardo - executive vice president, Salvador Ty - vice president for NCR, Virgilio Bote Jr. - vice president for Luzon, Lutgardo Barbo - vice president for Visayas, Charito B. Plaza - vice president for Mindanao, ug Pantaleon "Bebot" Alvarez - secretary-general.

Nahimong bag-ong senador ubos sa partido sila si Ronald Marapon dela Rosa sa Davao del Sur, Francis Tolentino sa Cavite, ug Christopher Lawrence "Bong" Tesoro Go sa Davao. Tungod sa pagdagsa sa daghang moapil, giawhag ni anhing Nene Pimentel nga susihon ang tinguha sa mga bag-ong pulitiko aron maseguro ang pagsunod sa ideyalismo sa partido.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph