SUPERBALITA DAVAO

Digos walay plano nga mobalik sa GCQ

File photo/Orlando Dinoy

DIGOS CITY -- Giklaro ni Mayor Josef Cagas nga wa siya'y planong morekomenda sa Inter-agency Task Force for Covid-19 nga ibalik sa general community quarantine (GCQ) ang dakbayan diin mas istrikto ang patakaran sa kuwarentinas ug mas limitado ang lihok sa publiko.

Sa pahayag sa mayor, gitataw niini nga daghan ang buot nang makabalik sa normal nga dagan sa panginabuhi susama niadtong wa pay coronavirus disease (Covid-19).

Ilawom sa kasamtangang community quarantine, gitugtan ang mga negusyo sa dakbayan nga maka-operate apan kinahanglan nga motuman sa istriktong minimum health protocols ug di sab mahimong 100 porsiyento nga maka-trabaho ang ilang mga empleyado mao nga katunga lang ang makatambong.

Matud ni Cagas nga adunay gahum ang lokal nga gobyerno sa paghimo og lakang aron makontrola ang pagtaas sa ihap sa mga nataptan sa sakit sa ilang lugar.

Kini sab ang hinungdan sa pagpagawas sa mayor og executive order alang sa 14 ka adlaw nga istriktong modified general community quarantine (MGCQ) gikan Oktubre 2-16.

Gipatuman sab sa siyudad ang provincial curfew hours gikan alas 8 sa gabii hangtud alas 5 sa buntag ug gidili ang mga selebrasyon sa bisan unsang okasyon.

Hinuon, gitugtan ang pagpamalit og ilimnong makahubog apan sa balay lang kini imnon.

Niadtong Oktubre 11 mao ang katapusang adlaw sa duha ka Dominggo nga "no movement policy" sa dakbayan diin adunay 26 ka malapason sa balaod ang nasikop sa kapilisan.

Apan matud niya nga dili kini mahimong molungtad og taas nga panahon gumikan kay dako ang epekto niini sa mga negusyo ug trabaho.

Gihimo lamang kining lakang alang sa hinanaling pag-kontrola sa nagkataas nga ihap sa mga nataptan sa kagaw ug ma-monitor ang sitwasiyon inubanan sa paspas nga contact tracing. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph