DI MAN nindot ang “Peninsula” o mas naila nga part 2 sa 2016 blockbuster hit nga Train to Busan. Ubos gihapon ni sa direksyon ni Yeong Sang-ho pero mas ganahan ko sa estorya sa Train to Busan kay mas duna siyay drama.
Sa “Peninsula” gud nahug ra nga background ang mga zombie sa estorya.
Ang pelikula naghubit sa usa ka sundawo ug sa iyang team nga gipada sa Peninsula nga gipuy-an na sa daghang zombie aron makuha ang nahibiling truck nga napuno sa salapi.
Apan dili pareho sa Train to Busan nga mas thrilling ug daghang horror scene sa mga zombie, ang Peninsula kay mga bandido na ilang kontra ug may pagka-Mad Max na ang dating. Layo ra sa akong gi-expect.
CHAMPION GYUD
Finally, ni-champion gyud ang Lakers. Sa pagsugod pa lang sa Game 6 nila kagahapon kontrolado na kaayo nila ang duwa.
Wa man nila makuha ang gipangita natong 4-1 nga record pero ang labing importante nga sila gyuy ni-champion nga katapusang nadaug niadtong 2009 ug 2010 pa nga gipangulohan ni anhing Kobe Bryant.
Karon nga nahuman na ang NBA season mangita na sad tag laing lingaw aron dili boring ang life. Haha...
CABLE
Nagsugod na ang ubang shows sa ABS-CBN sa A2Z Channel 11 niadtong Sabado.
Ambot nganong gitawag nila nig free TV nga sa cable ra man diay ni makita sama sa Sky Cable ug Cgnal.
Ang analog nga Channel 11 sa Cebu wala may reception. Puros ra hulmigas.
Usa ra gyuy solusyon ana. Ipagamit sa ABS-CBN ang ilang satellite dish sa TV 11 aron mokusog ang ilang signal. Kana kon dili na sad babagan sa mga haring gangis.
ANGEL
Tinuod gyud diay tong mga nag-viral nga litrato ni Angel Locsin?
Abi nako edited ra. Bisan ang chief artist sa Superbalita nga si Ariel Itumay nagtuo nga edited ra ang mga litrato ni Angel kay maorag lahi ra iyang pagkatambok.
Pero wa man gi-deny ni Angel ang mga litrato. Ang tubag ra niya nganong mag-problema man kuno ta sa iyang lawas nga wa man gani siya mag-problema.
“Katawan ko `to, ako `to, sarili ko `to. Eh ikaw okay ka ba?” birada pa sa kanhi Darna.
Di man sad ta kabasol sa reaksyon sa mga netizen. Libakon man gani nang dili kaila unsa pa kaha nang artista. Baya sad si Angel maora man sad siyag just now.