“DILI lang new normal apan better normal”, ang gitinguha ni Cebu Governor Gwendolyn Garcia sa lalawigan sa Sugbo nga iyang gibutyag atol sa ika-65 nga kasaulogan sa iyang adlawng natawhan, Oktubre 12, dungan sa pagbukas sa bag-ong Cebu North Bus Terminal nga naa sa tugkaran sa SM City Cebu.
Kini gitambungan ni Cebu City Mayor Edgardo, partner agencies ug stakeholders.
“Today is indeed the moment of triumph. It is a triumph against challenges. Nasayod kita sa kadaghan nga hagit nga akong giatubang. Labing dako mao na kadtong Covid-19 ug ang mga restrictions nga misunod niana. Ang pagkaguba sa atong ekonomiya tungod sa atong mga lockdowns, ang pagkawala sa trabaho sa atong mga kaigsuonan, ang kalisod sa kinabuhi,” matod ni Garcia.
Gikalipay sa gobernador ang kalamboan tungod kay gipakita sa mga Sugboanon nga mahimo gihapon nga mobarog ug mopadayon taliwa sa kalisod.
“It is a triumph because through all these, the Cebuanos showed that indomitable spirit that Cebuanos are known for. Never give up. Pangitaan gyud og paagi, dili mahimo nga moingon nalang ta, ah lisod, mag puyo nalang ta,” dugang sa gobernador.
Gipanglantawan ni Garcia nga sa pagbukas sa bag-ong terminal, mobukas usab kini og kahigayonan sa mga Sugboanon ug turista nga makasinati sa maanindot nga destinasyon sa amihanang Sugbo.
“Kining pag bukas nato sa Cebu North Bus Terminal karong adlawa, usa kini ka makabungog nga pagsabwag sa tibuok nasud ug tibuok nga Asya nga ang island of Cebu, kauban sa probinsya ug atong tri-cities, the island of Cebu the best island according to Conde Nast in the entire Asia, this beloved Cebu of ours not just for the new normal but for the better normal,” matod ni Garcia.
Ubos na sa pag duma sa kagamhanan sa lalawigan sa Sugbo, ipatuman usab ang mas estrikto nga health ug quarantine protocol sa Cebu North Bus Terminal (CNBT).
Mao kini ang gipahibaw ni Carmen Quijano ang manager sa Cebu South Bus Terminal (CSBT) nga gitahasan sa pagduma sa operasyon sa bag-ong terminal.
“Kuyaw kaayo. Ang face mask ug ang face shield ipatuman gihapon nato na,” matod ni Quijano.
Sukwahi sa bag-ong pamaagi sa CSBT, dili una ipatuman ang no ticket, no entry policy sa CNBT tungod kay obserbahan pa ang gidaghanon sa mga pasahero nga modagsa sa temporaryong terminal.
SUPORTA
Makapaabot og suporta ang Kapitolyo gikan sa Kagamhanan sa dakbayan sa Sugbo sa ilang mga tinguha para sa kaayohan sa mga Sugbuanon.
Si Labella nipadayag niini atol sa soft opening sa temporaryong North Bus Terminal.
“We will always be cooperative for the best interest of all the citizens of the island Province of Cebu,” paneguro sa mayor. / ANV, dugang taho ni PAC
Ang City Government, pinaagi ni Labella, nihatag og 30 ka adlaw nga provisional authority sa terminal para ilang makumpleto ang gikinahanglang mga dokumento sa pag-operate. (ANV, dugang taho ni PAC)