NIBANIOG kagahapon ang balita nga nidaog na si Rep. Lord Allan Velasco human moabot og 186 ka mga kongresista ang mingpirma nga nagsuporta sa iyang pagka Speaker sa Ubos Balay Balauranan kun Lower House.
Dili pa pormal nga sesyon ang napahigayon. Apan ang mahitabo kuno inig abli sa Kongreso karon mao ang formality. Si Speaker Velasco na ang midaog. Dili na si Speaker Alan Peter Cayetano.
Kini nahitabo human niguwa ang balita nga nagmiting silang Kong. Lord Allan Velasco ug Davao City Mayor Inday Sara Duterte-Carpio sa miaging Biyernes. Gi-apod-apod sa lain-laing mga media outlet sa Manila ang selfie nilang Lord ug Inday Sara nga nangaon.
Signal kini nga nilihok si Inday Sara ug ningbalitok na ang mga kongresista. Si Inday baya ang nakapadaog ni Speaker Gloria Macapagal-Arroyo sa ilang bugno batok kang Speaker Bebot Alvarez. Proven ang kaepektibo sa tabang sa mayor.
Nakahibawo na man kita nga sa pagsugod pa niining ikaduhang termino ni Presidente Rodrigo Duterte, naa na daan nagsuporta kang Kong. Velasco si Inday Sara. Apan, niadtong tungora, si Kong. Alan Peter Cayetano naninguha sab nga mahimong Speaker sa Ubos Balay Balauranan kun Lower House.
Kuyaw matunga ang mayoriya sa mga pro-Duterte nga nakadaog sa piliay sa Mayo 2019. Mao nga nisulod sa eksena si Presidente Duterte. Ilang gimugna ang giingong ‘gentleman’s agreement’ nga mag-term sharing.
Apan nagubot ang kahimtang kay naninguha ang kampo ni Speaker Cayetano nga magpabilin sa puwesto. Nagsigi og insister si Kong. Velasco nga mopuli karong Oktubre 14, 2020 basi sa maong gentleman’s agreement.
Kay nimando man si Presidente Duterte og special session, nagtuo kita nga kompyansa na ang kampo ni Velasco nga naa nila ang mayoriya.
Nakahinumdom gyud ko nga pipila lang ka adlaw gud kadtong higayona nga gipanawgan ang mga kongresista. Nakuha ni Speaker Arroyo ang mayoriya. Tikangkang gyud dayon si Alvarez.
Karon, nakakuha na og mga 186 ka mga pirma sa suporta si Kong. Velasco.
Kagahapon, nag-rump session na ang grupo nilang Kong. Velasco. Paagi kini alang sa pag-ihap kinsa gyud ang mosuporta sa iyang pagka Speaker.
Matod pa, niguwa nga mayorya na ang suporta alang kang Kong. Velasco. Show of force ang ilang gipahigayon. Ugma, igo na lang mo-deklarar og vacancy sa pwesto sa pagka Speaker. Formality na lang daw ang mahitabo ugma.
Apan wala kitay ideya sa buhaton sab sa kampo ni Cayetano. Mosukol pa ba kini o igo na lang moduko ug magpa-awt.
Kon modaog si Kong. Velasco, sigurado na ang suporta sa Ubos Balay Balauranan alang sa kandidatura ni Inday Sara sa 2022. Kon modaog si Cayetano moguwa nga nakuhaan na gyud og gahum ang mga Duterte. @anol_cebu sa Twitter