Balay-Balay, Tubig-Tubig: Katabang gilugos

Dear Atty. Joan,

Maayong adlaw Atty. Joan. Usa ako ka concerned citizen nga nagpakabana sa mga panghitabo sa among lugar.

Nidangop nako sa inyong buhatan pinaagi sa pagtubag sa inyong Children Legal Assistance Form nga anaa sa inyong Facebook page apan duna ko’y dugang pangutana.

Sama sa akong gisugilon kaniadto, aduna ko’y silingan nga nagpatrabaho og menor de edad nga babaye isip katabang sa ilang panimalay. Anaa sa tulo ka tuig na nga nanrabaho ang maong bata sa among silingan.

Nahibaw-an nako nga gilugos siya sa iyang amo nga lalaki. Katulo kini nahitabo human gisugid kanako sa maong biktima ang pagpanghimulos kaniya. Katapusan nga nahitabo ang pagpanglugos atol sa pagsugod sa kwarantina karong tuiga.

Gihulga siya nga patyon sa iyang amo kon musumbong sa kapolisan. Tungod kay wa na makaantos ang dalaga, nihangyo kini nga magpauban sa police station. Nasugdan na unta ang pag-file og sumbong batok sa iyang amo. Mihawa na sad ang biktima sa pagpanrabaho.

Pipila ka semana ang milabay human sa pagkiha, nahibaw-an nako nga gipapirma siya og “affidavit of recantation” nga giandam sa iyang abogado. Nakasulat kini sa pinulongang Ingles ug nasayod ko nga di makasabot ang biktima sa maong sulat. Tungod kay misalig siya sa abogado, wala ra sab siya nangutana kon unsay unod sa maong dokumento. Wala sab mipasabot kaniya ang maong abogado kon ngano kinahanglan mupirma sa affidavit.

Kon wa ko masayop, ang maong affidavit nagpasabot nga dili na mudayon ang biktima sa pagkiha ug gibawi niya ang mga pasangil batok sa iyang amo.

Mangutana unta ko Atty. Joan kon posible ba nga gamiton sa iyang amo isip ebidensya sa pag-abswelto kaniya sa maong krimen bisan pa man nga walay igong kasayuran ang bata sa iyang gipirmahan. Mahimo ba nga mapanubag ang abogado sa maong hitabo?

Daghang salamat ug unta mahatagan mi og katin-awan sa maong suliran

Imong magtatampo,

Jan

Dear Jan,

Una sa tanan maayong adlaw usab kanimo diha, Jan, ug salamat sa imong tampo niining atong lindog. Usa ka nga maayong ehemplo sa katilingban sa pagtabang sa mga batang gi-abusaran.

Kabahin sa imong unang pangutana, dili ma-abswelto ang akusado sa pagpanglugos sa bata kon ang maong affidavit ang himuong basehan tungod kay ang mga bata dili makahatag og pagtugot ubos sa atong mga balaod.

Una sa tanan, wala’y igong kasayuran ang bata sa iyang gipirmahan nga dokumento labaw na nga nasulat kini sa Ingles. Matod pa sa imong salaysay, dili makasabot og Ingles ang batang biktima. Ikaduha, walay mi-assist sa bata sa pagpirma sa dokumento sama sa ginikanan sa bata subay sa mga detalye nga imong gipasabot kanako. Ikatulo mao nga mahimong magpadayon ang pagdungog sa public crimes sama sa kalapasan sa Anti-Rape Law bisan pa man nga dili mupadayon ang biktima sa pagkiha sa akusado.

Sa imong ikaduhang pangutana, kasong administratiba ang mahimong isang-at sa abogado nga nagpapirma sa maong affidavit. Gitan-aw ang mga abogado nga duna’y igong kasayuran sa mga balaod sa nasod labaw na sa mga regulasyon nga dunay kalabutan sa mga abogado sama sa Rules on Notarial Practice ug Code of Professional Responsibility. Ang iyang gibuhat ngadto sa iyang kliyente usa ka kwestyonableng panghitabo nga sukwahi sa mga balaod.

Daghang salamat Jan sa imong sulat tampo ug hinaot nga natubag ang imong mga pangutan.

Imong alagad,

Atty. Joan

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph