GIMANDUAN ni Mayor Edgardo Labella si City Administrator Floro Casa Jr. nga mangulo sa rescue operation sa mga libudsuroy nga anaa mangatulog daplin sa kadalanan sa Dakbayan sa Sugbo.
Ikauban ni Casas ang Cebu City Police Office, Department of Social Welfare and Services (DSWS), Cebu City Anti Mendicancy Office, Cebu City Prevention, Restoration, Order, Beautification, and Enhancement (PROBE) team ug mga barangay diin magkatulganan ang maong mga tawo para mahipos.
“I directed the city administrator to conduct massive rescue of all of these kay dili man maayo tan-awn nga karon daghan na sad kaayong naa nanghigda sa mga pedestrian lane, kilid-kilid, usahay naa sa mga skywalk. So, I hope that it will be implemented very soon,” padayag ni Labella.
Ang mga taga lalawigan sa Sugbo papaulion sa ilang mga lungsod ug kadtong taga Cebu City papaulion sa ilang mga balay. Kadtong way kapuy-an maoy ipahimutang sa pasilidad nga tukoron sa City Hall.
“Ako sad gi-direct ang City Administrator nga mangita in a few days or in a few weeks nga makabutang ta og halfway house kay anha nato ni sila ibutang ang tanan natong ma rescue, “ dugang sa mayor.
Ang DSWS maoy mo-evaluate ug mohimo sa profiling sa na-rescue nga mga libudsuroy para sila matabangan nga libreng makapauli ug posibleng mapabawnan og ayuda, hilabi na niining panahon sa pandemya.
Ang mga bata nga ma-rescue suhiron sa DSWS ug Anti Mendicancy sa mga ginikanan.
Kon masuta nga adunay lapso sa ilang pagkaginikanan, maisyohan sila og citation ug mag-atubang og kiha subay sa City Ordinance 1531.