KON wa pa ang pandemya tingali usa na ka sikat nga artista karon sa kaulohan ang 25-anyos ug gwapitong Cebuano aktor nga si James Robert Saniel.
Pila ka buwan sa wala pa ang lockdown sunodsunod ang iyang mga proyekto ug pelikula nga naglakip sa “Balatkayo” ug “Team B-Terror” nga puros gipasalida dili lang sa Pilipinas kundi sa ubang mga nasud sa Asya.
Sa “Balatkayo” si James Robert ang niduwa sa papel nga anak nilang Ms. Aiko Melendez ug Polo Ravales nga dunay video scandal. Samtang sa “Team B-Terror” nidala siya nga happy-go-lucky nga sakup sa basketball team nga nakasinati og makalilisang nga hitabo sa gisak-an nilang dormitoryo.
Regular usab siyang makita sa telebisyon sama sa “Bubble Gang,” “Magpakailanman,” “Kapuso Mo Jessica Soho (KMJS)” ug uban pang mga teleserye sa Kapuso Network.
Apan tungod sa pandemya nibalik siya sa ilang hometown sa Argao ug nagpundar og gamayng negosyo ug nitabang sa ilang family farm nga maoy nakaabag karon sa ilang panginabuhian.
Nag-alagad usab siya isip contact tracer sa DILG (Department of the Interior and Local Government) diin dinhi niya nagamit ang iyang pagka-Nursing graduate.
Basaha ang akong Q and A sa ambungang aktor kay duna siyay gikumpirmar nga karon pa lang sad mapublikar. Unsa ni? Nia ang akong interbyu.
James Robert Saniel, Ssssuper Ka!
Taga-asa inyong mga kaliwat?
Gipanganak ko sa Angeles city, Pampanga. Kadtong panahon sa Mt. Pinatubo kay buntis akong mama sa ako-a that time. From Pampanga ni-transfer mi’g Manila dayon sa Argao, Cebu kay lumad man nga taga-Argao akong lolo. Dire nako nidako. Tulo mi ka managsuon, ikaduha ko. Naa koy ate nga naa sa Subic, Olongapo nagpuyo karon ug manghud nga usa ka Japanese citizen nga nagpuyo na sa Japan.
Giunsa nimo pagsud sa showbiz?
Nag-start ko sa modeling dire sa Cebu city. Si Stacy Lloren nga tag-iya sa “Stacy’s Exclusive” ang naka-discover nako. Nibalhin ko sa “Vamp modeling agency” hangtod nga gikuha kong artista sa mga teleserye sa CCTN channel 47 ug nahimong leading man sa “You’re My Everything,” “My Casanova Lover” ug “Lovelife sa Baynte.” Ako ang nidaug nga best actor sa ilang Cebu Film Festival.
Kinsay nag-manage nimo?
Si Benjie Alipio nga mao say nag-manage niadto nilang Ejay Falcon ug Tristan Ramirez sa Boyband PH. Usa pud sa nag-manage nako ang BG Production International. Thanks also to Dwinn Bello sa walang sawang suporta.
Unsay imong most challenging role?
Ang role nga `Jasper’ sa “Balatkayo” kay lahi nga James Robert ang inyong makit-an. Daghan mi og scene ni Ms. Aiko nga akong mother sa pelikula nga niuli from Singapore aron atubangon ang akong problema sa sex scandal nga nikatap sa online. Naa koy bed scene with Kristine Barretto.
Kumusta katrabaho si Aiko?
Ms. Aiko is very humble ug sobra kabuotan. Dire nako na-experience for the first time nga molakaw sa Red Carpet didto sa SM Megamall nga puno sa mga tawo ug picturan ka sa mga paparazzi ug interbyuhon sa mga showbiz reporter. Duna pa’y mga sikat nga artista ang nisuporta og tan-aw.
Unsay imong plano karon?
Dire lang una mi sa Argao kay bag-o pa sad nanganak akong partner pag-September 24 with our baby girl. Super proud kaayo ko ug di na nako angay itago sa public. She is a blessing. Her name is Jasmei Snow. Pero among tawag nya kay “Jimgirl” kay “Jimboy” man akong nickname so siya sad kay “Jimgirl.” Iyang mom si Meil Selvosa, nga naa pud sa modeling industry. Two years na mi.
No marriage plans yet?
Siyempre naa, pero sa pagkakaron dili pa especially sa sitwasyon nga down pa ang industry ug dili pa sad mi financially stable. Siyempre excited ko nga moatubang sa altar sa kaminyuon kauban ang tawo nga love kaayo nako uban sa among baby. Usahay makahunahuna ko nga nindot na gyud ibalik sa showbiz pero sa panahon karon murag lisod pa kaayo ibalik og Manila tungod sa Covid. It’s better safe than sorry. I’m also planning to take NCLEX exams para maka-work sa U.S. as a nurse aron makatigom ug makapabuhat na mi sa among dream house sa akong pamilya.