Mag-uuma mitiyabaw sa pagtikad sa Holy Land

Hulagway iya ni Orlando B. Dinoy
Hulagway iya ni Orlando B. Dinoy

BANSALAN, Davao del Sur -- Kasakit ug kaguol ang gibati sa mga yanong mag-uuma sa Sitio Neptune sa Barangay Managa human apektado ang ilang mga pananum sa pag-develop sa Holy Land nga gihimong laaganan sa mga lokal ug langyaw nga turista.

Nakapalibot sa lugar ang mga tanum nga gulay sa mga mag-uuma apan nangadaut kini gumikan sa gitrabahong dalan.

Usa si Elsa, 45, nga mialma human nga naapil og buldos ang ilang mga tanum nga carrots ug patatas hinungdan nga dako ang lugi sa ilang kapital nga giutang pa aron makasustento sa pag-atiman niini.

Sa social media sab gipagawas ni Irish Joy Perigrino ang kasakit sa iyang gibati human masayod nga dili diay ma-refund ang ilang nagasto sa gulayan.

Nasayran nga usa ka yanong mag-uuma ang mi-donate sa iyang yuta aron matukod ang Holy Land nga matud pa proyekto ni Representative Mercedez Cagas.

Apan sumala ni Perigrino nga sila nga mga pobre ang naapektuhaan sa proyekto gumikan kay nawad-an na sila og pananum sa lugar.

Sumala niya nga angayang gihatagan sila og panahon aron makapangandam apan nahimong kalit-kalit ang pagkahanaw sa ilang pananum.

Sama kaniya, daghan pang mag-uuma sa lugar ang giluom na lang ang ilang kasagmuyo apan nanghinaut nga matabangan sa lokal nga gobyerno nga di malugi sa ilang kahago.

Ang mag-uumang si Delfin, 37, nagbutyag nga dili angay nga yano-yanohon ra silang mga pobre sa pagpahawa sa lugar tungod kay taas na nga panahon silang nabuhi sa ilang umahan.

Nanawagan karon ang mga mag-uuma sa lugar nga lantawon ang ilang kahimtang nga patas ug di interes lang sa ubang personalidad. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph