KIDAPAWAN CITY -- Patay ang usa ka ulitawo dihang nahagbong sa gisakyan nga motorsiklo ug naligsan sa wing van alas 8:50 sa gabii, Martes, Oktubre 13, 2020.
Giila ang biktima nga mao si Ivan Silvestre, 19, nagpuyo sa Sitio Gomez, Barangay La Esperanza, Tulunan, North Cotabato.
Sumala ni North Cotabato Police Provincial Office Director Colonel Henry Villar nga hubog ang biktima nga angkas sa motor sa iyang barkada gikan nag-inom kay birtdey sa iyang paryente sa M'lang ug mopauli na sa ilang balay.
Apan sa dihang pag-abot sa Km. 125, Barangay La Esperanza kalit siyang nahagbong sa motorsiklo.
Tayming sab nga maoy pagsunod sa wing van, naligsan kini ug sa lain pang motorsiklo.
Patay on the spot si Silvestre nga nakaangkon og grabeng bali, pangos ug samad sa kalawasan.
Naharang hinuon ang wing van ug drayber niini didto sa Makilala apan ang drayber sa gisakyan nga motor sa biktima ug ang drayber sa laing motor nga nakaligis sa biktima nakaikyas. (Edgar E. Fuerzas)