COTABATO CITY -- Nalisang ang mga sibilyan sa dihang aksidenteng nibusikad ang rocket sa MG-520 Attack Helicopter sa Philippine Air Force (PAF) alas 8:15 sa buntag niadtong Martes.
Kini ang gikompirma ni Lieutenant Colonel Dingdong Atilano, tigpamaba sa 6th Infantry (Kampilan) Division, Philippine Army.
Sumala ni Atilano nga naa sa landing zone sa Cotabato Airport sa Barangay Awang, Datu Odin Sinsuat, Maguindanao Province ang nahisgutang helicopter apan aksidente nga milupad ang usa ka rocket niini ug mibusikad.
Maayo na lang kay padulong kini sa kalubihan sa Barangay Balabaran sa Cotabato City ug didto mibusikad hinungdan nga way naangol kay layo sab sa kabalayan.
Apan tungod sa kakusog sa pagbusikad, nalisang ang mga molupyo sa pagtuo nga gisulong ang kampo sa militar sa mga dautang elemento.
Samtang dako ang pagtuo ni Atilano nga posibleng "technical problem" sa weapon system sa helicopter.
Sa pagsuwat ning balita, nagpahigayon og follow up imbestigasyon PAF Tactical Operation Group sa Maguindanao Province sa maong hitabo. (Edgar E. Fuerzas)