PADAYON ang gihimong imbestigasyon sa Talomo Police Station labot sa pagpusil sa usa ka pasahero sa dyip kagahapon sa buntag didto sa Kilometro 11, Barangay Catalunan Pequeño, Davao City.
Ang Talomo police nag-ila sa biktima nga si Benjamin C. Buan Jr., 37 anyos, ug residente sa Ulas, Davao City.
Nasayran nga sakay ang biktima sa PUJ dunay rotang Mintal-Roxas diin pag-abot sa Kilometro 11 sa Catalunan Pequeño usa ka buto ang nadunggan sa drayber.
Diha dayon nahagba ang biktima sud sa dyip, ug gilayong nanagan ang kaubanan nga pasahero sa kalisang sa hitabo.
Human sa insidente, gilayong gidala ngadto sa Southern Philippines Medical Center ang biktima kinsa padayong gitabang sa mga doktor sa pagsuwat ning balita kagahapon.
"We are currently working on the identification of the suspects with the help of possible witness/es in the area and pursuit operation against the fleeing suspects. We are still checking for CCTV in the area that will help in our investigation. At this time, yan pa lang po ang aming maibibigay na impormasyon," sumala ni Police Captain Victor Maquindang, deputy station commander sa Talomo police. (Jeepy P. Compio)