KIDAPAWAN CITY -- Bungkag ang depasaherong van nga mibangga sa trak alas 2:55 sa hapon niadtong Miyerkules, Oktubre 14.
Atol sa maong insidente, usa ka 4 anyos nga bata nga molupyo sa Matalam, North Cotabato ang namatay nga mao si Junan Antelino.
Sa taho gikan sa North Cotabato Police Provincial Office (NCPPO), nasayran nga paspas ang dagan sa D4D van nga gimaneho sa amahan sa bata nga si Junjun.
Ni-overtake pa gyud kini sa laing sakyanan pag-abot nila sa Barangay Kilada, Matalam.
Apan kalit nga mibutho ang kasugat nga closed van nga maghatud unta og karneng manok sa Sta. Cruz, Davao del Sur gikan sa Misamis City, hinungdan nga nahitabo ang bangga.
Milikay unta ang van, dungan pagpreno niini, apan tungod sa ulan ug kadangog sa dalan, wala mipaak ang brake, hinungdan nga mikaliring sa highway ug diretso nga mibangga sa trak.
Naipit sa front seat ang bata nga maoy hinungdan sa iyang kamatayon, samtang naangol ang amahan ug lain pang pasahero niini nga gihatud ngadto sa balay tambalanan.
Samtang naangkon sab og mga bun-og sa lawas ang drayber sa closed van nga dunay karga nga dressed chicken ug duha sa iyang mga helper.
Nagpasidaan si NCPPO Director Colonel Henry Villar sa mga drayber nga mag-amping sa pagmaneho ug hinay-hinay lang gumikan ulan-ulan ang panahon aron makalikay sa disgrasya.