ANG mga local government unit (LGUs) sa Metro Manila nagkahi-usa nga dili na sila mopahigayon og Christmas Party karong buwan sa Disyembre. Mao kini ang nakab-ot nila nga desisyon pinaagi sa Metro Manila Development Authority (MMDA) nga ikanselar ang mga Christmas parties gumikan sa coronavirus (Covid 19) pandemic. Likayan gihapon ang tapok-tapok kay napanglantawan sa mga mayor nga dili pa gihapon ma-normal ang situwasyon nianang maong buwan.
Atong angkunon, labi na sa mga empliyado, nga gawas sa Christmas bonus, ang lain natong gi atangan matag tuig mao ang atung Christmas parties. Tibuok tuig, ang Christmas parties maghatag og talagsaong matang sa kalipay sa mga trabahante nga mosangpot sa mas maayong working relationship sa mga trabahante ug sa mga amo sa usa ka kompaniya.
Apan subo lang palandungon nga ning panahon sa pandemya kinahanglan gyud kita nga ‘mangwenta’ una ug makalibo ka higayon kon kanang tumong nato sa hapsay nga relasyon sa panarbaho makapanagang ba batok sa misteryoso og wa pay tambal nga matang sa kagaw. Tingali , mas sayon tunlon alang kanatong tanan kon angkunon na lang nato ang di malalis nga mga kamatuoran.
Sama pananglit nga ang Covid 19 mi-usab sa atong pamaagi:
Sama sa edukasyon, pagpanarbaho, pagpangumpra o pagnegosyo, pagpamasada ug paghugoy-hugoy sa uban. Halos tanan natong kalihukan giusab sa Covid 19.
Kon nakadawat kita ning tanang mga kausaban sa atong kinabuhi nganong ma-exempted man ang mga Christmas Parties o lulinghayaw?
Pero pwede ra man siguro nga mag-Christmas party, apan dili na gyud pareho kaniadto nga daghan kaayo ang manambong. Wala nay mga presentation o mga sayaw-sayaw aron kalikayan ang panagtapok. Sa mga government offices, puwede ra man siguro nga i-per department aron dili kaayo daghan ug adunay social distancing. Magparty ta uy aron ato pod matagamtaman ang diwa sa Pasko luyo ning pandemya. (bobbygnalzaro@gmail.com)