SUPERBALITA CEBU

Super Suroy: Luxury Resort nga barato

SA MGA nangita og resort aron maka-unwind o maka-relax sa kanunayng pakigkumbate sa tibuok adlaw nga trabaho o kadtong mga gikapoy og tinu-on sa modules (magtutudlo, tinun-an o ginikanan), apan abot-kaya ra sa bulsa.

Diay lugar nga ikaw makapahuway dungan sa pakiglingaw-lingaw uban sa pamilya, barkada o kauban sa trabaho nga haom sa inyong budget.

Ang Doogoon Doogoon B&B (bed and breakfast) Hotel Resort maghatag sa inyong katagbawan.

Lokasyon

Ang Doogoon Doogoon nahimutang sa Sityo Kauswagan, Barangay Bankal, dakbayan sa Lapu-Lapu, Cebu.

Gibana-bana nga 45 minutos ngadto sa usa ka oras nga biyahe kon nanukad sa dakbayan sa Sugbo.

Daghang access nga agi-anan paingon sa maong dapit mamahimong mosubay sa M.L. Quezon National Highway gikan sa taytayan subay sa Barangay Pusok, Ibo, Mactan diin ang landmark nga timan-an ang AA Barbecue Soong Branch nga nag-atbang sa eskena Banka-Mahayahay-Soon Road nga maoy inyong sudlon.

Sa kadtong way private vehicle dili maguol tungod kay ang dapit adunay traysikol nga mobiyahe ug sa paghisgot lang sa pangalan sa maong resort matultolan na sa traysikol drayber ang inyong destinasyon.

Adunay tricycle terminal sa merkado publiko area ug sa Tamiya terminal.

Apan inyong sabton nga tungod kay gipa-ubos pa ang dakbayan sa Lapu-Lapu sa modified general community quarantine (MGCQ) ang traysikol unit mokarga lang og duha ka pasahero, busa ayaw pagbagutbot ilabi na nga taas ang pangayo sa pletehan (tricycle rate dili magparehas).

Resort

Inig tungod sa atubangang bahin sa resort nga nahimutang daplin sa Mahayahay Road dili open ang gate niini, sukwahi sa ubang resort nga inyong nabisita nga bukas kanunay ang ganghaan.

Tungod lang ba kaha kanunayng sira gumikan sa pandemiya?

Pislita lang ang doorbell ug way 10 segundos moabli ang guwardiya sa maong gate aron sa paggiya ninyo paingon sa sulod.

Mas bintaha nga nakapa-book mong daan sa inyong accommodation aron nga ihatod mo sa ilang mapahiyumon nga staff nga si Melife Sincero ngadto sa room nga inyong na-book in advance.

Modawat sab sila niadtong walk-in apan way kasiguroan kon aduna pay available nga rooms kay dili matag-an og atol nga daghang local guest.

Tungod sa nasinateng pandemya apektado ang Doogoon Doogoon, ilabi na nga way incoming flights sa mga langyawng turista ang gitugotan ning panahona, nga maoy sagad sa ilang clients ilabi na ang mga Koreano.

Ang Doogoon Doogoon adunay tulo ka andana nga edipisyo alang sa guest rooms samtang ang ilang reception or lobby area nabuwag kay nahimutang kini sa atubangang bahin.

Amenities

Gipahibawo sab nga way silay gitugotan nga day-use apan gikinahanglan nga mokuha og kuwarta alang sa overnight stay ninyo.

Dili mabalaka tungod kay ang matag lawak nga maka-accommodate og tulo ka tawo ang anaa sa P2,000 diin ang regular rate niini sa wa pay coronavirus disease moabot ngadto sa P5,000 ang gabii.

Di ikamahay ang lawak tungod sa kalapad niini nga adunay duha ka twin size beds ug adunay sofa nga makalulinghayaw kon dili pa ninyo feel nga mamahuway.

Adunay Smart TV, kusog nga WIFI signal, mini-refrigerator, electric kettle, toiletries diha sa lapad nga shower room ug toilet.

Pool/Karaoke rooms

Labing kinaham sa tanan mao ang ilang swimming pool nga abli gikan sa 8:00 am – 12:00 midnight.

Adunay gilawmon nga 5 feet nga matag adlaw gilimpyohan ilabi na sa mga tinagak nga dahon ug buwak sa Kalachuchi.

Sa mahilig mag-selfie dili kabintaha-an ang inyong pose nga i-post sa inyong tagsa-tagsa ka mga social media account ilabi na diha sa ilang sunbed sa pool side nga morag anaa mo sa five star resort.

Gawas pa niini, adunay karaoke ang maong resort diin magtagbaw mo og kanta sa atbang nga bahin sa pool area sa kantidad nga P300 per hour.

Ang naka-nindot sa karaoke rooms kay ang atubangang bahin niini nag-umbaw sa pool.

Gipahibawo sab sa management nga tungod sa sitwasyon sa Covid-19. kasamtangan nilang gisira ang ilang restaurant, hinungdan nga sila mitugot nga magdala mo og kaugalingon ninyong pagkaon, free of corkage.

Alang sa dugang inpormasyon o sa kadtong interesado nga mo-booked sa inyong pagpanuroy o weekend getaway, mamahimong moduaw sa Doogoon Doogoon official Facebook page.

Unsay pay inyong gipaabot suroy na sa Doogoon Doogoon! Di gyud mo magmahay sa kahayahay.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!