WALA nay angay kabalak-an ang 500 ka mga residente sa tulo ka sitio sa Barangay Pajac, dakbayan sa Lapu-Lapu mahitungod sa kabalaka kalabot sa ilang road right of way.
Kini human nga gipasaligan sila ni Lapu-Lapu City Mayor Junard 'Ahong' Chan nga dili masirado ang ilang naandang agianan bisan paman kon gamiton na unya sa nanag-iya og luna sa ilang lugar ang iyang gipanag-iyang yuta.
Una niini, nabalaka ang mga residente sa posibleng pagsira sa ilang naandang agianan kon gamiton na ang luna diin sila mag-agian.
Ang mga apektadong residente misuwat og petisyon ni Chan aron tabangan sila sa ilang kabalaka nga posibleng ma-lockdown o way kaagian.
Matod ni Celestino Aying, pangulo sa City Urban Poor Office, nga ang tulo ka sitio nga apektado unta mao ang Sitio Bagong Buhay, Bukid-Bukid ug Lupa kon i-develop na ang luna diin sila mag-agian kaniadto.
Apan human nga mibisita si Chan sa lugar, iyang gipasalig ngadto sa mga molupyo nga moabli og laing duha ka karsada sa dapit dugang sa naandang karsada karon pinaagi sa expropriation proceedings diin paliton ang pribadong luna aron magamit sa publiko.
Ang tag-iya sa luna nipasalig unta ni Chan pinaagi sa pagtawag sa cellphone nga andam mohatag og 1 1/2 meter access road sa mga molupyo, apan gigamyan ra ang mayor niini sanglit delikado kon dunay emerhensiya. (GCM)