TUNGOD sa ilang nakit-ang patay nga baboy nga nasangit ilawom sa usa ka tunnel nga nagtabon sa sapa-sapa diin gianod ang 14-anyos (di 16 anyos suma sa unang taho) nga batang lalake niadtong baha sa Martes sa gabii, nakaplagan sa mga rescue personnel ang lawas nga natabunan sa mga basura.
Mga ala 1 pasado sa hapon sa Huwebes, Oktubre 15, nakaplagan ang, lawas sa bata ilawom sa tunnel duol sa Rahman Bridge sa Barangay Zapatera, Dakbayan sa Sugbo.
Sama sa mga basura, nasangit ang lawas ni Hansel Dayondon, taga Bolinawan, Dakbayan sa Carcar, apan kasamtangang nagpuyo uban sa mga kabanay sa may General Maxilom Avenue sa Barangay Camputhaw, Dakbayan sa Sugbo.
Matod ni Cebu City Disaster Risk Reduction and Management Offfice (CCDRRMO) officer-in-charge Ramil Ayuman, nga dihang ilang gilili ang tunnel niadtong Miyerkules sa gabii, ilang nakita ang usa ka patay nga baboy nga nasangit sa ilawom.
“Actually, nagduda mi kay daghang nangasangit, naay baboy,” matod ni Ayuman sa interbyu sa Superbalita Cebu.
Matod niya nga ang mga rescue personnel sa CCDRRMO, Bureau of Fire Protection (BFP) ug Quick Response Team (QRT) ningsuway sa pagsulod sa tunnel, apan naglisod sa pagginhawa ug ngiob usab kaayo.
Kini ang hinungdan nga ilang gihunong ang search and retrieval.
Si Ayuman niingon nga ang pagkasangit sa baboy ug daghan pang mga basura maoy nihatag kanila og ideya nga dako ang posibilidad nga naa ra sa ilawom sa tunnel ang lawas.
“Duda mi nga naa didto (tunnel). Mao to gibalikan namo pagkaugma (Miyerkules). Didto man nasangit,” dugang ni Ayuman.
Laing gibasehan sa ilang pagduda mao nga wa kini nila makit-i sa ilang search sa ubos, gikan sa bahin sa sapa-sapa sa Sityo Silangan sa Barangay Tejero ngadto na sa pier.
Si Ayuman niingon nga ang tunnel gama sa hotel nga karon mao na ang White Knight Hotel, nga mitabon sa creek nga unta di kini mahimo.
Sa Biyernes sa buntag, Oktubre 16, 2020, magtagbo sila sa Office of the Building Official (OBO) ug City Engineer’s Office aron hisgutan kon unsay ilang buhaton sa estruktura.
“Kon ako lay pabut-on, ako nang gub-on,” matod ni Ayuman kay di mahimong tabunan ang usa ka creek sa pribadong tawo o kompaniya, dugang niya.
Nangluod
Si May Ann Danieles, inahan ni Dayondon, niasoy nga buwan na kapin ang iyang anak niuban sa iyang igsuong babaye sa pag-anhi sa Dakbayan sa Sugbo.
Matod niya nga si Hansel nangluod human gikaaway niini ang iyang manghod. Si Hansel kamaguwangan sa upat ka mga magsuon.
Matod ni Danieles nga human siya masayod nga nikuyog ang iyang anak sa iyaan, wa siya mabalaka.
Si Danieles usa sa mga tigtinda og chicharon sa kadalanan sa dakbayan sa Carcar.
Samtang si Lucia Mariveles, apohan ni Hansel, niingon nga sa wa pa ang baha, nipasilong sila sa taytayan sa General Maxilom Avenue diin sila magkatulganan kay nibunok ang uwan.
Dihang nakabantay sila nga nisaka ang tubig, dali silang nangatkat sa karsada, apan nauwahi si Hansel, gibanlas kini sa kusog nga bul-og sa tubig.
“Last namo nga pagkakita naanod na siya. Wala na siya nakagunit gyud,”asoy sa apohan.
Abagahon
Di angay mabalaka ang mga tagtungod ni Hansel sa paghipos sa iyang lawas human siya makit-i 44 oras sukad siya gianod sa baha niadtong Oktubre 13.
Si Mayor Edgardo Labella, kinsa nakighinabi sa iyaan, niingon nga ang City Government pinaagi sa Department of Social Welfare and Services (DSWS) moabaga sa gastohan sa pagpalubong.
Ang mayor maoy nimando sa CCDRRMO, BFP ug mga rescue group niadtong Oktubre 14 sa di paghunong sa ilang search and rescue ug nahimong search and retrieval human ilang nakita nga hanap na ang kahigayonan nga buhi pa ang bata.
“Pasalamat mi kang Mayor kay mitabang sila. Gipaningkamotan gyud nila akong apo nga makita,Sir,” sulti ni Mariveles sa Superbalita Cebu.
Susihon
Ipatawag ni Labella ang mga tag-iya og dagkong mga establisemento nga gipangtukod duol sa mga sapa.
Si Labella nitahas sa OBO ug CCDRRMO sa pag-ila sa mga building aron mapangitaan og win-win solution.
“I-identify ang mga buildings nga naa diha sa atong mga creeks nga adunay obstruction. Ato una silang ipatawag human ma-identify, together with DPWH kay pinasubay sa balaod ug regulasyon, kining pagkuha og permission diha sa mga creeks and rivers, nag-agi na sa DPWH kay ila man kining katungdanan,” dugang ni Labella.
Iyang gitahasan si Ayuman, uban ni Architect Florante Catalan sa OBO, pag-ila sa mga building kansang parte sa edepisyo naa sa creeks.