SunStar file
SunStar file

Sam-ang limitahan sa 30% lang

NAGPAGAWAS na sab og direktiba ang lokal nga panggamhanan sa Matanao, Davao del Sur alang sa nagkaduol nga paghandom sa mga Adlaw sa Santos ug Minatay sa Nobiyembre 1 ug 2.

Gimando ni Mayor Vincent Fernandez nga sirad-an ang ilang sementeryo gikan sa Oktubre 29 hangtud sa Nobyembre 4, mao nga way bisan usa nga mahimong makapanagkot ug makaduaw sa mga lubnganan sa lugar.

Sumala ni Fernandez nga mahimong makaadto na ang ilang mga molupyo sa sam-ang una ang adlaw sa pagsirado aron makahigayon nga makaduaw sa ilang mga minahal sa kinabuhi nga mitaliwan na sa laing kalibutan.

Apan sumala ni Fernandez nga limitado gihapon sa 30 porsiyento ang mga moadto sa sementeryo mao nga hugot nga ipatuman ang social distancing ug uban pang protocols sa Inter-agency Task Force on Covid-19.

Gimando sa mayor ang istriktong pagpatuman sa Provincial Ordinance Number 53 nga mao ang pagmulta sa tanang mosupak sa public health protocols.

Busa, kinahanglan nga magsul-ob og face mask ug face shield ang tanang adunay transaksiyon sa mga buhatan sa gobyerno ug pribado.

Mapasalamaton si Fernandez nga mikunhod na ngadto sa usa na lang ang aktibong kaso sa Covid-19 sa ilang lugar gikan sa tulo niadtong Septyembre 17.

Anaa sa ilang municipal isolation unit ang pasyente ug nanghinaut ang mayor nga di na kini madugangan pinaagi sa kooperasyon sa katawhan. (Orlando B. Dinoy)

Related Stories

No stories found.
SunStar Publishing Inc.
www.sunstar.com.ph