NAKUHA sa Sugbuanong karateka nga si James de los Santos ang World No. 1 E-Kata ranking human siya midaog og 15 ka gold medals sa managlahing online nga mga torneyo sulod sa pito ka mga buwan.
Niadtong Huwebes sa gabii, gipagawas na sa SportsData.Org ang ilang bag-ong ranking nga mipakita kang de los Santos isip numero unong E-kata practitioner sa tibuok kalibutan pinaagi sa iyang 8,950 puntos.
Ang 30-anyos nga kanhi miyembro sa national team miilog sa maong titulo gikan kang Eduardo Garcia sa Portugal nga natagak sa ikaduhang pwesto nga adunay 8,575 puntos.
Usa kini ka dakong milestone alang kang de los Santos kay nakahatag man kinig dungog sa nasod taliwala sa mga hagit nga giatubang karon tungod sa pandemiya.
Ang karatedo padayong giduwa bisan pa man sa pandemiya kay aduna may virtual nga kompetisyon alang sa Kata, nga usa ka demonstasyon sa mga lihok sa karatedo.
Nasakmit ni de los Santos ang numero unong pwesto pinaagi sa pagdaog og gold medals sa Okinawa E-Tournament World Series, 1st Euro Grand Prix E-Tournament 2020 ug 2nd E-Karate Games 2020 niining buwana.
Gipadayag ni de los Santos nga mas dako ang hagit kaniya karon nga anaa na niya ang No.1 spot kay daghang mga karateka ang mo-target sa iyang puwesto.
Gusto niyang humanon ang maong tuig nga anaa gihapon kaniya ang No. 1 ranking.
“It’s not over. I have to maintain the No. 1 spot throughout the year. That the bigger challenge,” matod ni de los Santos.
Si de los Santos nabiyaan og 3,000 puntos niadtong Agusto, 2020 apan naningkamot siya nga makaapas pinaagi sa pag-apil sa managlahing torneyo kada semana.
Sukad niadtong lockdown nakabulsa na og 15 ka gold medals si de los Santos, wala pay labot niini ang mga silver ug bronze medals.
Si Masa Saito, ang kata coach ni de los Santos niingon nga ang maong kalampusan nagpasabot lang nga wala’y imposible kon magkugi ug maningkamot ang usa ka tawo.
“I’m really glad. The path so far isn’t always easy. But we never give up and we climbed up to the top. I am so happy that I’m sharing this moment with this amazing karateka in James,” matod niya.
Ang miyembro sa International Shotokan Karate Federation mapasalamaton sa tanang misuporta kaniya sa iyang tahas.
Ang anaa sa luyo ni de los Santos sa World ranking mao sila si Silvio Cerone-Biagoni (4,585), Matias Moreno Domont (4,455) ug Nejc Sternisa (3,980). (RSC)