Paglaom ni Joy sa Olympics nagkahanap

File Photo
File Photo

DAWATON ni Mary Joy Tabal kon unsa man gani ang iyang dangatan kabahin sa iyang tinguha nga makasalmot pagbalik sa prestihiyusong Olympics nga ipahigayon sa Tokyo, Japan sa sunod tuig.

Ang 30-anyos nga marathoner magpa-qualify unta alang sa Tokyo Olympics apan naapektohan ang iyang tibuok eskedyul tungod sa hagit nga dala sa coronavirus disease (Covid-19) pandemic.

Si Tabal miangkon nga lisod pa gihapon ang pagsalmot og lumba karon sa gawas sa Pilipinas tungod sa daghan og travel restrictions ug kasagarang nasod nagtugot lang sa essential travels.

Gilauman ni Tabal nga gamay ra ang mga lumba nga puwede na sa sunod tuig kay nagsugod pa man sa pag-adjust ang tibuok kalibutan sa gitawag nga new normal.

Bisan pa man niini, positibo gihapon si Tabal nga aduna’y major races nga moabli na sa sunod tuig.

“There are some major events sa 2021 to look forward to may it be or may not be the Tokyo Olympics. It might not be for me, but will aim for the next one, maybe Paris 2024, when everyone is ready and safe,” padayag ni Tabal sa Superbalita Cebu.

Angay pa moapil si Tabal og qualifying races para masulod sa Olympics. Tungod sa kausaban sa kalibutan hayan nihanap ang iyang poruhan nga makabalik sa Olympics nga iyang unang nasalmotan niadtong 2016 Rio Games.

Ingon niya nga kon wala gyu’y maapilan nga qualifying races sa first quarter sa 2021, molantaw na lang siya sa umaabot nga 31st Southeast Asian (SEA) Games sa Vietnam nga gitakda sa Nobiyembre 21 ngadto sa Disyembre 2 sa sunod tuig.

“Maghuwat lang ko sa announcement sa qualifying races, kon wala gyud then mag-focus na lang dayon ta sa SEA Games 2021,” ingon sa one-time SEA Games gold medalist.

Ang Tokyo Olympics ipahigayon unta karong tuiga apan napugos ang mga tigdumala niini lakip na ang mga lider sa Japan nga iuswag kini sa Hulyo 23 ngadto sa Agosto 8 sa 2021.

“Ingun sila madayon ang Tokyo Olympics maski gamay participants but unsaon man na nga only few accredited races raman ang naa sa Asia, tapos postponed pa gyud,” pasabot ni Tabal.

Si Tabal nagpadayon sa iyang training sulod lang sa ilang village sa dakbayan sa Sugbo. Wala pa siya mobuhat og road run kay nahadlok pa siya sa hulga sa Covid-19. (RSC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph